هبرة سمك حيلة


         وصفة : منى                 2014/04/13                 4 تعليقات
هبرة سمك حيلة

هبرة سمك حيلو وصفة اتعلمتها من صفحة أم عبدو الحلبية الأصلية , وصفة كتير سهلة , و كلمة حيلة معناها انو ما حيكون فيها لحمة , بصراحة جربتها و انا مو متوقعة يطلع معي شي كتير طيب , بس الوصفة أغرتني لان سهلة و فيها فكرة لنستفيد من الخبز البايت و وصفة صيامية كمان .. ما كنت متخيلة كيف ممكن الخبز يصير عجينة و لا كيف ممكن يشرب كل النكهات و تكون طعمتو طيبة , و لا كيف ممكن يقرمش قرمشة غير شكل … عن جد الوصفة فاجأتني
بالعادة أنا ما بستعمل مكعبات مرق دجاج أبداً , بس لهل الوصفة استعملتهن , بس رح جرب مرة تانية استعمل مرق حقيقي لشوف كيف حتطلع معي الطعمة .
بالصحة و الهنا

-المقادير:

1 رغيف خبز بايت ( حوالي 200 غ )
نصف إلى ثلاث أرباع كوب ماء
نصف مكعب مرق دجاج
2 فص ثوم , مهروس
نصف حبة صغيرة بصل , مفروم مبشور
ملعقة صغيرة كزبرة
ملعقة صغيرة فليفلة حمراء ناعمة
نصف ملعقة صغيرة كمون
ربع ملعقة صغيرة بهار أبيض
- طريقة التحضير :

1 - يقطع الخبز لمكعبات صغيرة , يوضع مكعب المرق و الماء في قدر صغير على النار حتى تغلي . يصب على الخبز و يعجن حتى تصبح لدينا عجينة متجانسة .
الخبز مقطع مكعبات صغيرة
2- تضاف البهارات و الثوم و البصل و تعجن حتى تتوزع في العجينة .
العجينة
3 -. تقطع العجينة إلى 10 كرات و تشكل بهيئة أقراص
تقرص العجينة

4 - تقلى بالزيت الغميق , ترفع على ورق ماص و تقدم فوراً مع صلصة الطحينة و السلطات .

التعليقات

  1. ياسمين 22 April 2014

    رووووووعة موني تسلم ليديكي

    • منى 22 April 2014

      الله يسلمك ياسو , منورة :)

  2. karam 8 December 2014

    شكرا كتير من ايمت و انا مستنيكي تنزلي هالوصفة شكرا كتير لالك بتمنى يوما ما تقدري تنزلي كمان وصفة كريم التوم، خاصة انو هبرة السمك مع كريم التوم شغلة بتاخد العقل .. هي الاكلة من مقبلات مطاعم الارمن بحلب حسب ما بعتقد يمكن مشان هيك حضرتك ما كنتي بتعرفيها (انا ماني حلبي قحي اصلنا لادقاني :) ! ما بعرف بس كريم التوم جربت كزا مرة وكل مرة يطلع معي شراب اصفر و تكون كاسة زيت زيتون كاملة و ليمونة و بيضتين راحوا كلون عالكب!! قلت حرام هالكفر و عاد بطلت احاول… تحياتي

تقييم الوصفة
عاديةقد أحضرهاجيدةممتازةأكثر من رائعة (3 votes, average: 3.67 out of 5)