ezme تغميسة البندورة على الطريقة التركية


         وصفة : منى                 2011/10/23                 5 تعليقات
ezme تغميسة البندورة على الطريقة التركية

اليوم وصفتنا مدري سلطة مدري تغميسة , شوفي الي بيناسبك . اول مرة دقتها بمطعم في غازي عنتاب و كانت بتاخد العقل , يمكن لان الأكل كله كان أطيب أكل باكله مو بس بتركيا لا بكل حياتي , أو يمكن لان كان الجو حلو و اول الربيع , أو يمكن لان كنت بوقتها مبسوطة كتير .. المهم طعمة هل السلطة بقيت تحت سناني و اد ما جربت اعملها ما عم تطلع معي متل الي دقتها بتركيا , مو بالطعم لان الطعم نفسه , بس القوام , سلطة تركيا كانت الا شوي متل المعجون بس فيه قطع صغيرة كتير , انا ما عم تطلع معي الازمي ناعمة شو ما فرمتها , بس طعمتها يممممم .

اتوقع الي اخترعها كان عم يحضر لحم بعجين , قام شال شوي من الخضار المفرومة و حضر منهم سلطة .. يسلموا ايديه على هل الفكرة الطيبة .

المفروض اننا نفرمها ناعم ناعم ناعم بس من دون ما تنهرس وانا عم افرمها على سكينتي المفضلة , الي بتشبه سكينة عمو اللحام الي الها ايدتين و بتفرمي بسهولة و بيسر و بنفس الوقت اذا كنت معصبة من اولادك لان ما عم يدرسوا أو من حالك لان ما نظمتي يومك منيح او من واحدة من رفقاتك لان عاملة فيك فصل ناقص , اي اذا كنت معصبة بتفشي الي قلبك بهل الخضرة و بتروحي و بتجي على لوح الفرم لوقت ما تروقي و تصير الخضرة هل الاد صغيرة .

أخر شي هل السلطة اذا تركتيها شوي بتتركز الطعمات كلها مع بعضها و بتصير اطيب .

بالصحة و الهنا




ملعقة كبيرة معجون بندورة
ملعقة كبيرة دبس فليفلة
ربع كوب زيت زيتون
فلفل أسود و ملح
ملعقة صغيرة نعناع مجفف
نصف ملعقة صغيرة فليفلة حمراء حرة أو حلوة حسب الرغبة
2 حبة بندورة
1 حبة صغيرة فليفلة حمراء أو خضراء
2 حبة بصل أخضر أو بصلة صغيرة جداً
نصف كوب بقدونس
2 ملعقة كبيرة دبس رمان





• يمزج زيت الزيتون و معجون البندورة و دبس الفليفلة و دبس الرمان و الملح و الفلفل و النعناع و الفليفلة الحمراء الناعمة و توضع جانباً .

• تقشر البندورة و يزال منها البذر ثم تفرم ناعماً جداً . يفرم البصل و البقدونس و الفليفلة الحمراء ناعماً جداً .

• تمزج الخضار سوياً مع التتبيلة , يضاف عصير الليمون اذا دعت الحاجة ثم تقدم .

التعليقات

  1. ام نبيل 23 October 2011

    السلام عليكم
    عنجد كنت عبدور على طريقة هالتغميسة تسلم ايدك يارب
    والله يعطيك العافية على الموقع الرائع اللي صار مرجع الي بكل طبخاتي
    وطبعا جربت كتير اكلات وكانت بتجنن :)

  2. نورا 23 October 2011

    صار لي زمان كتييييير مالي معلقة على أي وصفة ، بس هدا ما بيعني أبداً أنه مالي متابعة ملتزمة ومن الطراز الرفيع :grin بس والله قلة فضا وديق وقت يضاف إليها كسل ( لا أنكره) بس اللي شجعني أكتب من جديد غير الوصفات الرائعة اللي عبتنزليها هو المطعم المذكور … عن جد أكلت فيه مرة واحدة وإن أنسى لا أنسى لحمه بعجين اللي فعلاً من أروع ما أكلت في تركيا كلها ، والبقلاوة الفاخرة اللي ما دقت متلها بحياتي …
    فلما شفت سلطته اللي ما دقتها عنده للأسف قررت أضيفها إلى قائمة الشغلات اللي لازم
    أعملها إن شاء الله وإن كنت ( وللأمانة ) مشتهية دوقها عنده  :roll

  3. منى 25 October 2011

    و عليكم السلام ام نبيل :)
    الله يديم المعروف و المحبة و الف صحة و هنا على البك على كل شي جربتيه :zzz

    ان شاء الله تجربي هل الوصفة و تكون على زووءك و تعجبك

  4. منى 25 October 2011

    هلا نورا :)
    بعد زمان القمر الحلو ما بان , انو لو اعرف كنت من زمان جبت سيرته لحتى شوف ردك :zzz

    انا كمان دقت اللحم بعجين , حبيته بس كانو اللحم بعجين بحلب اطيب ؟
    بس باقي الاكل كان بياخد العقل , بجد ما دقت متله بكل حياتي :zzz

    ان شاء الله تجربيها و تكون تل ما بتحبي و اكتر و الف صحة و هنا على البك مقدما

  5. mazna 16 December 2011

    السلام عليكم سيدة منى لقدتعرفت الى موقعكم بالصدفة وقداعجبني كثيرا والطعام شكله واكيدطعمه روعة.عندي طلب واتمنى من حضرتكم تساعدوني بعد فترة عيدميلادابنتي وسأكون بلبنان ولا اعرف ماذا اعد كبوفيه من مأكولات او حلويات فأرجو مساعدتي ببعض النصائح لتكون مفاجئة للجميع هناك.مع جزيل الشكر لكم ولموقعكم المميز ةاتمنى لكم اعيادامجيدةوان يكون عام2012 عام خير وبركة للجميع

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)