أفضل وصفة كوكيز على الاطلاق ..والعودة الى التدوين


         وصفة : منى                 2018/10/19                 25 تعليقات
أفضل وصفة كوكيز على الاطلاق ..والعودة الى التدوين

best ever cookies
أفضل وصفة كوكيز على الاطلاق ..والعودة الى التدوين

مرحبا يا اصدقائي الغالين المخلصين المحبين .. عبكتب هل الكلمات وانا معبوطة , اخر مرة كتبت وصفة كانت من 2014 ن مر عمر يعني ، , بدي قلكم أن لما فتحت الاب توب و انا ناوية اكتب هل الوصفة ..كنت عبرجف .. متل لما تقابلي حدا بتحبيه كان غايب من زمان . وشي بيضحك انو كان لازم ادور على word لانو ولا مرة ما استخدمته من لما فرمتت الجهاز … وصباح يوم الجمعة راح وانا عبدور على شعار اللقمة .. بس اخيرا لقيته


بتعرفوا لما الواحد بيكون بده يعمل احسن شي ومابتتيسر القصة بيقوم بياجل وبياجل لحتى تخمد الحماسة ويبقى من المشروع كله عبارة عن فكرة غامضة وقديمة .. هيك كان عبيصير فيني .
كل ما اقرر ارجع .. تكون احلامي كبيرة .. لازم ارجع بفيديو مهم , لازم يكون معي مقدمة عظيمة , لازم تكون الوصفة خارقة .. وهيك تم تاجيل هل الموضوع ( الي كنت اعمله كل يومين تلاتة باول التدوين ) تم تاجيله سنوات .. ويمكن ما حدا بيعرف كيف بتهرب السنوات متل الي عاش بالحرب .

المهم يا اصدقائي الغالين ، اليوم انا رجعت بوصفة خارقة ..الوصفة الي مقاديرها مضبوطة على التكة ، الوصفة الي تعبت وانا عبزبطها والي اخدت معي وقت طويل لاعتمدها ، والي هي شي خاص بكورساتي ، والي رح تزبط معك من اول مرة وكل مرة باذن الله . كوكيز الشوكولا الافضل على الاطلاق ..الكوكيزرح يكون متفجرة بطعم الشوكولا ، غنية كتير مقرمشة من برة مع طبقة طرية من جوة، بعدين سهلة كتير بوعاء واحد بتتحضر ..ومقاديرها سهل تتوفر .


يا ريت لو حدا جربها يبعتلي صور هون او على صفحة اللقمة على الفيس بوك . رح اكتب المقادير بالغرامات وبالكاسات ، واذا حدا بده يجرب الوصفة على المضمون يجربها بالميزان .. . يرروح يشتري ميزان / لانه قطعة كتير اساسية ومهمة بالمطبخ ، وبمجرد ما نقول وصفة حلويات احترافية ، معناها لازم تكون مكتوبة بالغرامات لضمان الدقة ونجاح الوصفة باذن الله .


رح اوعد حالي واوعدكم ان يكون في وصفة جديدة مرة واحدة بالاسبوع اذا رب العالمين يسر ، طبعا مع قصص وخبريات متل العادة .


مشتاقتلكم كتير

خلونا نبدا باسم الله المبدع الكريم .. ومتل ما كنت ااقول .. صحة وهنا

كمية تكفي لاعداد 24 قطعة تقريبا

200 غ سكر ابيض ( كوب )
50 غ كاكاو خام ( يفضل استخدام افضل نوعية) ( نصف كوب )
185 غ طحين ( كوب وثلث )
نصف ملعقة صغيرة ملح
نصف ملعقة صغيرة بيكنغ بودر
ربع ملعقة صغيرة بيكربونات الصودا
فانيليا
115 غ زبدة مذوبة ( ما يعادل اكثر من نصف باكيت بقليل )
30 غ زيت نباتي ( ما يعادل نصف فنجان قهوة )
1 بيض
شوكولا حبيبات حوالي 100 غ ( الكمية حسب الرغبة )
1 – يحمى الفرن على درجة حرارة 180 درجة مئوية . تغطى صينيتا فرن بورق الزبدة.
2- في وعاء متوسط الحجم تقلب المقادير الجافة معا ( السكر و الطجين و الكاكاو و الملح , بيكربونات الصودا البيكنغ بودر ).
3- تضاف البيضة والزبدة والزيت والفانيليا ورقائق الشوكولا ويقلب الكل بلطف بمضرب سلك يدوي . لا يقلب بشكل زائد .
4- باستخدام ملعقة ايس كريم او ملعقة عادية تؤخذ كرات من العجين وتوضع في الصواني المجهزة. تكبس بطرف اليد لتسطيحها قليلا . السماكة حسب الرغبة .
5- تخبز الصواني في الفرن المحمى لمدة 8-12 دقيقة . تبقى الكوكيز طرية حين تخرج من الفرن وتقسى بعد ذلك.
6 – تحفظ في وعاء محجم الإغلاق بعد ان تبرد .

التعليقات

  1. ضحى دقسي 19 October 2018

    لو سمحتي ممكن المقادير بالكاسات او الملاعق وثانيا وين ممكن نلاقي شوكولا حبيبات وهل ممكن نستبدله بالواح شوكولا مقسمة ناعم؟

    • منى 19 October 2018

      اهليين يا ضحى :)
      تكرمي رح اعمل تعديل على الوصفة مشان المقادير بالكاسة .

      فيك تاخدي الحبيبات من عند البيان بالفرقان او الباشي بتجميل المشارقة
      لا مافيك تستبدليه ، لان الحبيبات بتكون معالجة لحتى ما تحترق على الحرارة المباشرة بعكس الشوكولا

  2. سكينة اللغميش 19 October 2018

    مو مصدقة عيوني

  3. Rim grewati 19 October 2018

    منى الغالية الحمدلله على رجعتك ورجعة كلماتك الندية ولقمتك الطيبة

    • منى 19 October 2018

      خليلي ريمو الغالية اللطيفة متل نسمة :)

  4. Rana 19 October 2018

    شكرا أنسة منى عالوصفة كتير
    هاده أول تعليق الي عالنت مع اني بقرأ وصفات كتير
    حبيت شغلك كتير من جديد شفتك عالفيس
    كنت بحب اتعلم شغل حلويات بس يادوب لحق اعمل لاولادي بالبيت

    • منى 19 October 2018

      اهلين يا رنا
      الي الشرف ان التعليق الاول كان في لقمة طيبة.
      اتهني بالصغار بكرة بيكبروا بغمضة عين
      نورتي

  5. Rana 19 October 2018

    كلامك حلو كتير
    موفقة بشغلك

    • منى 19 October 2018

      شكرا رنا على الدعوة الحلوة :)

  6. نونا 20 October 2018

    السلام عليكم ست منى
    يعطيكي الف عافية
    انا متابعتك بصمت من ٥سنين
    وعطول بدعيلك وفرفح قلبي شفتك منزلة وصفة جديدة واخيرا
    ربي يسعدك ويجزيكي الخير

    • منى 25 October 2018

      وعليكم افضل السلام واتم التسليم :)
      هاد شي بيعنيلي كتيررر والله الله يكرمك ويرفع مراتبك .. ان شالله رح يكون في جديد دايما ، ودايما بانتظار رد منك

  7. وصال احمد 25 October 2018

    اانا وصال…
    اشتقنالك ست منى وانا من متابعينك عطول المرجع الاساسي بكل طبخاتي هو لقمة طيبة
    الله يجزاكي الخير ع جهودك
    وانا مبسوطة رجعت شفت حكياتك الحلوة
    والله يوفقك ولاتغطي علينا

    • منى 25 October 2018

      اهليين ياوصال :)
      هاد من حسن حظي والله ، ان شالله مليون هنا على كل شي جربتيه.
      ان شالله مافي غطة:D

  8. الهامو 25 October 2018

    نورتي ياأحلى منى متابعتك من ايام خالو تقي

    • منى 25 October 2018

      نيال قلبي ياالهامو ..منورة

  9. perla katja 25 October 2018

    Hi and welcome back!!!!! I am very happy that you are back again!! How are you? it has been a long time! are you still in Syria Aleppo? God bless you!!!

    • منى 25 October 2018

      thank you Petra for your nice words . I’m good thank God ..It had been 4 long years since I wrote down a recipe !
      I’m still in Aleppo and I never leave it during the war.
      happy to hear from a new follower .. thank you :)

  10. منى 25 October 2018

    صباح الخيرات نونا :)
    مبسوطة ان سمعت منك ..ان شالله تبقي منورة على طول

  11. Nada 1 November 2018

    و اخيرا و اخيرا رجعتي مدام منى
    بشكرك كتير انك رجعتي
    مستحيل أتخلى عن موقعك الرائع
    جد شكرا لانك رجعتي

    • منى 1 November 2018

      شكرا الك ندى على هل الكلام وهل الثقة ن ان شالله بوجودكم رح يبقى الموقع يكبر ويكبر

  12. سوسن 4 November 2018

    نور الفضاء الالكتروني كله يا منى :)
    عودا حميدا و انا بانتظار ابداعاتك و قلمك المبدع بشوق

    • منى 6 November 2018

      ياسوسنة يا ريحة الايام الحلوة :)
      شكرا من القلب

  13. دانا 1 January 2019

    اهلا وسهلا وعوده مباركه ..
    والله يجزيك كل خير على هاد الموقع الرائع ..مرجع لكل طبخاتي تقريبا، وما شاء الله عنك شارحه الوصفات بطريقه وافيه ومو بخلانه علينا ولا بمعلومه ولا سر المهنه متل ما بيقولوا لهيك كل شي بيزبط ولله الحمد.
    سؤالي بتزبط الوصفة اذا استخدمنا بدال الطحين شوفان ؟
    او اذا عامله وصفه خصوصي لكوكيز الشوفان ياريت تحطيلنا ياه ويسلمو اديك سلفا

    • منى 4 January 2019

      اهلا وسهلا يادانا
      الله يكرمك ويديم هل الثقة الغالية وان شالله ابقى دايما ند حسن ظنك :)
      صراحة ولا مرة عملت كوكيز بالشوفان ، وماعندي فكرة اذا ممكن نستبدل الطحين فيه ، بس لفتي نظري لهل المكون ، ان شالله عن قريب ببدا بستخدمه بحلوياتي ، ممنونتك

تقييم الوصفة
عاديةقد أحضرهاجيدةممتازةأكثر من رائعة (13 votes, average: 3.85 out of 5)