سلطة المعكرونة و الأفوكادو


         وصفة : منى                 2011/02/05                 16 تعليقات
سلطة المعكرونة و الأفوكادو

اشتريت من حوالي الاسبوع أفوكادو. و كانت واحدة من الاخوات سألتني كيف منشتري الافوكادو و على ايا اساس منختار الحبات ؟ الأفوكادو ممكن نشتريها مستوية و بهل الحالة لازم نستعملها باقرب وقت ممكن و نحفظها بالبراد لوقت الاستعمال . أو فينا نشتريها مو مستوية و هيك بتبقى عنا بالبيت لتستوي على مهلها .

هل تعلم أن الافوكادو هو النبتة الوحيدة الي طول ما هي على الشجرة ما بتستوي ؟ و ان لازم نقطفها لحتى تصير لينة و قابلة للأكل ؟ و هل تعلم أن شعوب اسيا الوسطى و الشرق الأقصى ما بيستخدموا الافوكادو الا للحلويات و للمشروبات ؟ و هل تعلم أن الافوكادو بتخلي البشرة نضرة و الشعر ناعم و أملس ؟ و هل تعلم أن الدهون الموجودة في الأفوكادو هي من الدهون الغير مشبعة و المفيدة جدا للجسم . و أخيرا هل تعلم أنك إذا فتحت الافوكادو قبل نضجها بتكون راحت عليك و ما بقى تستفيد منها بشي لان طعمتها بتكون مرة و مو طيبة أبدا ؟

لحتى نعرف أن الافوكادو ناضجة منلمس عليها و ملمسها لازم يكون طري و قاسي بنفس الوقت . يعني كانك حطيتي اصبعتك على علبة الزبدة الي صرلها شوي طالعة من البراد . كيف بتحسيها ناعمة بس بنفس الوقت فيها نوع من الصلابة . نفس الملمس لازم يكون لحبة الافوكادو . أما إذا اشترينا كم حبة و كانوا لسا بدهن وقت ليستووا فلازم نحفظهم بدرجة حرارة الغرفة لحتى يستوا , مو بالبراد , و إذا بدنا ياهم يستووا بسرعة أكبر فمنحطهم بكيس ورق مع حبة تفاح و منخليهم بدرجة حرارة الغرفة لحتى يستووا .

ايه خبرتكم اني اشتريت افوكادو و حضرت فيها كم وصفة بتاخد العقل و هي اول وصفة . يعني سلطة معكرونة و شبت و كمان افوكادو , طعم طيب وين ما اكلتي . و مع اني ما كتير بحب اخلط المايونيز مع البندورة , بس هل الوصفة استثناء . و على فكرة البندورة الي استعملتها بندورة مصرية , مو بيوت بلاستيكية . و كمان مع اني ما كنت كتير حب فكرة خلط المايونيز مع اللبن , هلا صايرة عم حبها كتير و ايا سلطة بدها مايونيز عم استخدم نص الكمية لبن و النص التاني مايو , عم تصير اخف و عم اكل منها ضميري مرتاح و مبسوط بالوجبة .

أخر الشي إذا ما بتحبي الدجاج أو الحبش المدخن أستعملي دجاج مسلوق للوصفة .

بالصحة و الهنا





2 كوب ( 250 غ ) معكرونة من الحجم الصغير
5 شرائح دجاج أو حبش مدخن , مقطع شرائح رقيقة
2 - 3 حبة بندورة , مقطعة
نصف خسة صغيرة , مقطعة
1 حبة كبيرة أفوكادو ناضجة
3 – 4 ملعقة كبيرة عصير ليمون

الصلصة :

نصف كوب ( 125 غ ) مايونيز
نصف كوب ( 125 غ ) لبن
بشر ليمونة
نصف ملعقة صغيرة ملح
رشة فلفل أبيض
2 ملعقة كبيرة شبت مفروم




• تسلق المعكرونة حتى تقارب النضج ثم تصفى جيداً و تترك لتبرد . تمزج مقادير الصلصة في طبق كبيرة ثم تتبل بها المكرونة و تترك جانبا حتى اعداد بقية المقادير .

• يقشر الافوكادو و يقطع ثم يمزج مع عصير الليمون كي لا يتغير لونه .

• تمزج المعكرونة و الافوكادو و البندورة و الخس و الدجاج المدخن و يضاف المزيد من عصير الليمون حسب الرغبة .



التعليقات

  1. haya 5 February 2011

    واو يا منى شكلها يميييي شكلها لذيذة ان شاءالله بدي اجيب افوكادو وأجربها

  2. منى 5 February 2011

    ان شاء الله تجربيها و تكون على زووءك :zzz طيبةةةةةة

  3. emerald 5 February 2011

    تسلم أيدك أكيد رح جربها صار جربت أغلب وصفاتك وأكتر شي من قسم الكاتويات زوجي حبهن كتير بس على هل حالة بدي أطلع من الشتا وما عم يجي علي شي من تيابي. شكرا كتير ألك والله يديمك ألنا ولا يحرمنا منك ومن وصفاتك.

  4. غيث 6 February 2011

    كيفك منمن اشتقنا لك الله يعطيك العافية اكيد على التجريب منظرها بيشهي وزوجي كتير بيحب هيك اكلات اشقد حب سلطة المعكرونة لما عملتها من وصفاتك واعتمدتها طبعا لك كل الشكر وجزاك الله عنا كل خير ;)

  5. semo 6 February 2011

    مرحبا منى كيفك والله كتير اشتأتلك واشتقت لكل البنات هون مابعرف اذا تذكرتيني انا غبت فترة طويلة بس كان عندي ظروف خارجة عن ارادتي ونتيجة هالغيبة بعد صبر 7 سنين ومعاناة وحرمان انا حامل باخر الشهر الرابع الف حمد وشكر لك يارب العالمين
    اسفة عالغياب
    من يومين دخلت عالفيس ولئيت الوصفة وئلت لازم ارجع وقلك اديش هالوصفة طيبة وشهتني وانا حامل وانا مرتاحة راحة تامة ياريتني عندك لتسكبيلي شي لقمة دوقها واكيد هاللقمة لقمة طيبة
    صحتين والف هنا على قلب اللي اكلوها وبس يقوى حملي شوي باذن الله رح جربها اكيد وخصوصا وحامي عالمواااااااااااالح بشكل مو طبيعي يعني لدرجة باكل مخلل حاف :p

  6. منى 6 February 2011

    سلام سمسومة :)
    ان شاء الله الف الف الف مبروك حبيبتي ربي يقومك بالسلامة و يجعل قدوم الكتكوت الجديد خير عليك و على باباته و هي خبرية بطير العقل :zzz

    الحمد لله رب العالمين هل الشهر في تنتين من امهات لقمة طيبة حوامل بالشهر الرابع و كمان بعد طول انتظار , بقى فرحتنا ما منعطيها لحدى

    بس على فكرة زعلت منك , كيف يعني بتتذكريني :roll
    امبارحة كنت على بالي و قلت ان شاء الله خير عل الغيبة

    ديري بالك على حالك

  7. dado 6 February 2011

    يم يم يم
    بموت على الافوكادو انا، بحبها لحالها وبسلطة الجبنة والحبق، والذ من هيك مع الحليب والموز. رح جرب هالوصفة بكرة انشالله، بس بعد اذنك منوش رح اعملها نباتية هالمرة. متاكدة انها طيبة كتير.

  8. منى 7 February 2011

    هلا غيوثة :)
    هي طعمتها مختلفة عن هديك و التنتين يممي , و انا كمان كتير بحب هل النوعية من الاكلات , هيك خفيفة و بيشبع بنفس الوقت :zzz

    رح استنى رايك

  9. منى 7 February 2011

    هلا emerald :)
    ان شاء الله الف الف صحة و هنا و عافية على البك و الب ابو الشباب , الحمد لله انهم عجبوكي

    منورة و مية هلا فيك :zzz

  10. منى 7 February 2011

    هلا دلوش :)
    انا حتى بحبها لحالها مع عصرة ليمون , يعني اني عم اطل دسم بس مفيد , هادا الاحساس بس بيعطيني راحة :grin

    انا كتير احيان بعملها نباتية و بتطلع يمممم , خبريني رايك ;)

  11. مدام الصن 8 February 2011

    سلام منى الغاليه رح احاول اجرب هالوصفة مبارح جربت كبه العدس مع سلطتها وياسلام شو كانت طيبه مسحنا الصحن مسح يسلم ايديك وشكرا الك

  12. منى 8 February 2011

    صحتين و الف الف عافية , يا ستي انا متل حكايتكم لما بحضرها بمسح الصحن على اد مو طيبة و خفيفة :zzz

    ان شاء الله تجربيها و تعجبك ;)

  13. bobo84 8 February 2011

    سلام ست منى بدي اتشكرك كتير عهالوصفات الغير شكل بصراحة لما كنا بسورياابدا ما كنا نستخدم الافوكادو بس بعد ما جيت عالسعوديةكنت استحليه بالسوبرماركت وجبتو يمكن شي مرتين بس مت كنت لاقيلو شي وصفة طيبة وكنت كل مرة إرميه بس هالمرة أكيد رح جيبو وجرب هالسلطة اللي رح تكون غير شكل لأنها من عند الست منى والله يعطيك ألف عافية :grin

  14. منى 8 February 2011

    ان شاء الله تجربيه و تحبيه :)

    ضيعانه الي رميته لان حتى لو عصرتيله ليمون بيكون طيب مع الخبز و البندورة ;)

    رح استنى رايك و مية اهلا و سهلا فيك اختي

  15. ام جنى عبيدات 20 February 2011

    بجد رهيبه كيف زبطت معك تحطي الافوكادو مع المعكرونه؟؟ اول مره بسمع بهالوصفه.. يسلم ايديكي اكيد رح اجربها انشالله :zzz

  16. منى 22 February 2011

    شايفة يا ام جنى شو عندي افكار جهنمية :grin

    صحتين حبيبتي مقدما , اشتقتلك ;)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)