كاتو التشيز كيك


         وصفة : منى                 2010/05/08                 55 تعليقات
كاتو التشيز كيك




قالب اسفنجي بالشوكولا

التشيز كيك :

علبة كريما بيضا
نصف كوب حليب بارد جداً
علبة قيمر أو قشطة ( بمكن استبدال الكريما البودرة و الحليب و القشطة بالكريما الفرش )
200 غ جبنة فيلادلفيا ( يمكن استبدالها بـ 10 مكعبات كيري ) بدرجة حرارة الغرفة
علبة جيلو أصفر ( أناناس أو موز )
ربع كوب ماء مغلي
نصف فنجان سكر بودرة
عصير نصف ليمونة

للتزين :
pie filling النوع المفضل مثل الكرز او الفريز او التوت
أو بسكويت سادة مطحون





• يحضر الكيك في قالب ذو جوانب منفصلة ثم يقلب على مشبك سلك و يترك حتى يبرد . تنظف نفس الصينية و تغلف بورق اليمنيوم على الأطراف , يرجع الكيك للقالب و يسقى بالقليل من الحليب أو أي نوع عصير مفضل .

• يذوب الجيلو بالماء المغلي و يترك حتى يبرد .

• تخفق الكريما و الحليب البارد حتى تسمك الكريما و تشتد .

• تضاف الجبنة و الجيلو المذوب و السكر و عصير الليمون و يخفق الكل حتى يتجانس المزيج .ا

• يصب مزيج الجبن فوق الكيك ثم يرجع للبراد و يترك لمدة 4 ساعات .

• يعند التقديم يفك القالب ز يوضع في طبق التقديم و رش الوجه بالبسكويت المطحون او بالزينة المختارة حسب الرغبة و يقدم مع شرائح الفريز .
  • وصفات تانية ممكن تعجبك


التعليقات

  1. فرفوشة 8 May 2010

    ياعيني عليك يامنى شو فنانة
    ماشاء الله حولك وحواليك
    إن شاء الله ألف مبروك وعقبال مية سنة
    والله يديم عليك الصحة والعافية وتنورينا بهيك أطباق
    كل سنة وكل من شارك بهالموقع بألف خير :grin

  2. منى 8 May 2010

    كيف قفشتيني :grin

    لسا مو حاطة الوصفة على الصفحة الرئيسية :zzz

    ان شاء الله الصحة و الهنا و الرزق الحلال حواليك و عليك , شكرا كتير الك

  3. لارا مينا 8 May 2010

    :) :) :)
    مساء الخير أخت منى ولجميع الأعضاء الكرام , وإن شاء يكون الكل بألف خير …. كنت حابة أعيد الموقع من يوم الأربعاء الماضي بس قلت أنتظر شوي حتى تكون المعايدة رسمية وعن طريق وصفة تكون خاصة بهذه المناسبة..ويارب تكوني دايما مشغولة بالخير وتاخذي على قد عملك وتفانيك … وعن جد إحنا مبسوطين لكل خطوة وتقدم للموقع وأهم شيء بالنسبة لنا وفي نظرنا أكيد إنه الموقع رقم واحد ,, وبانتظار المفاجآت على أحر من الجمر حتى لو كنا مش من أهل حلب ,ألف تحية لكي وملتقانا بإذن الله في عيد جديد للقمة طيبة.

  4. ام نور 8 May 2010

    كل سنة ولقمة طيبة بالف خير وعقبال المية سنة من الاستمرارية والعطاء كيفك منى اشتقنا لا اطلالتك علينا ولا هالوصفات الحلوة وين هالغيبة انشالله تكوني بخير وبانتظار مفاجئاتك باذن الله

  5. omtasneem 8 May 2010

    السلام عليكم ورحمة الله وبركاته. والله متل ماقلت الايام بتمرء ومالنا حاسين وعن نفسي مابيجي يوم الا الصبح اول موقع بفتحو عالسريع لشوف شو في شي جديد وسبحان الله اذا عملت شي وصفة من الموقع ولاقت الاحسان بتلائيون مابصدقوا انو من النت الله يلبسك العافية ويديملك زوجك واولادك والله صار عندي فضول اشوفك واتعرف عليك عن قرب وكل سنة والموقع بتتطور وازدهار :)

  6. ميساء 8 May 2010

    عزيزتي منى كل سنة ولقمة طيبة بألف خير ومن نجاح إلى نجاح بس بدي قلك أنو هالموقع الرائع هو من صنعك أنت وبتوفيق من رب العالمين لما أعطاك الله من موهبة واحساس وشفافية لأنك مو بس شيف رائعةولكن أنت إنسانة مرهفة وأنا دوما بس شوف وصفة جديدة إلك بفرح لأني بعرف حالي بدي أقرأ قبل الوصفة مقدمة أو فكرة أوخواطر كتير حلوة وبتلامس شعور كل واحدة منا في بيتنا اللي أنت جمعتينا فيه ومو بكيفنا لكن اجباري عنا وأنا واحدة من يلي مو ممكن أفتح النت واتصفح أي موقع قبل ما عرج على بيتي الحلو وطلطل على ميمو وأخواتهاوشوف أخبار الكل وأقرأ كل تعليق و كل نصيحة وكل نهفة حتى صرت حافظة أسماء أولادكن وبعرف شو بتحبو و شو بتشتغلو وشو بتدرسو :)
    شكرا كتير منى لمحبتك وقلبك الكبير والله يسعدك ويهنيك بعمرك برفقة عيلتك الحلوة وكل حبايبك يا رب

  7. غيث 8 May 2010

    الله يسلم هاليدين ميمو كيفك وان شاء الله كل عام ولقمة طيبة بالف خير وشهرة اكتر ونجاح اكبر وانت واهلك وكل الغوالي على قلبك بمليون خير والله يزيدك اكتر ويزيد هالاسرة الحلوة اللي جمعتنا ببعض اسرة لقمة طيبة هالاخوات المذوقات والذواقات والله يديم المحبة بيننا يا رب بيظل لقمة طيبة وانت بقلوبنا ولو ما علقنا دائما وما بنقدر الا ونطل عليه يوميا اما لرؤية كل جديد او للاستعانة به بطبخة ما جزى الله عنا كل من يشترك بهذا الموقع كل خير يا رب

  8. فرفوشة 8 May 2010

    سبحان الله !!!
    من كتر ما حبيت هالموقع صرت أتصفحه باليوم كذا مرة وأشوف شو الجديد(المحبة من الله) شو أعمل مو بإيدي ;)
    الله يجزيك الخير ع الدعوات الحلوة ويبارك فيك يارب

  9. منى 9 May 2010

    هلا لارا :)
    مسا الخيرات و الورد البلدي
    انا كمان مبسوطة فيك و بتلاقيني بس ما شوف اسمك بين المتصفحين ابتسم لا شعوراياً :zzz
    الف شر الك لارا و على فكرة الوصفات وصلي و شكلهم مغري كتير

  10. منى 9 May 2010

    هلا ام نور :)
    و انت بالف خير و صحة انت و اولادك و ابو الشباب
    متل ما قلتلك الغيبة في وراها قصتين ببقى بخبركن عنهن لما بيجي وقتهن :zzz

  11. منى 9 May 2010

    هلا ام تسنيم :)
    و عليكم السلام و اتم التسليم
    الله يخليلي ياكي على هل الدعوة الكريمة و الغالية
    صحتين و عوافي على كل شي جربتيه و زبط معك و نال اعجاب الجماهير :zzz

  12. بشرى 9 May 2010

    الغالية منى .. كل سنة وإنتي ولقمة طيبة بألف خير يارب .. الله يديم علينا هالعيلة الحلوة ويديم المحبة يارب .. سنة مرت وما حسيت فيها بالنسبة إلي .. الله يخليلي ياكن .. وكل سنة والكل بألف صحة وخير ..

    ووصفتك أكتر من رائعة .. عالتجريب قريباً إن شاء الله ..

    دمت بحفظ الله منوش :)

  13. farah 9 May 2010

    بصراحة تفاجأت لما لقيت الوصفة بقسم الكاتويات وصار فيي هيك :eek وقلت لحالي كيف نفدت هالوصفة من تحت ايدي وانا تقريبا كل يوم بعمل تفقد للموقع :zzz
    كأنك ما نزلتيها عالصفحة الرئيسية ؟؟
    ياستي ربي يكرمك ويعيد عليكي وعلى كل الاخوات والموقع هالعيد بمزرد من التألق والنجاح والتقدم والارتقاء الى اعلى مستوى بين المنتديات
    صحيح انا مالي معكم غير من حوالي 9 شهور بس والله صرتوا بمعزة أهلي واخواتي
    وحتى اني غرت من أهل حلب للمفاجأة اللي بدك تخصيهم فيها :cry
    بس رح استنى المفاجأة التانية بيجوز يكون النا نصيب فيها :grin
    على فكرة وصفتك كتييير عجبتني لأني من محبي التشيز كيك وصايرة بتردد ساويه للسبب اللي ذكرتيه
    لذلك قريبا انشاء الله رح جربه تسلم أناملك يا رب

  14. juman 10 May 2010

    مبارك اخت منى وان شالله 100 سنة يا رب,,,حبيت هنيكي واتشكرك عوصفاتك الطيبة,,ويا ريت تعتبريني متل اختك الصغيرة’’لانو اول مرة بجرب وصفات غير وصفات الماما,,,ومنقولة من عالنت كمان :) خصوصا بالغربة كل شي صعب يحصله الواحد من وصفات ومكونات,,يسلمو كتير وللامام يارب

  15. منى 10 May 2010

    هلا ميوسة :)
    شكرا كتير الك لكل الكلام الي في ردك :)
    تبقي ان شاء الله بخير انت و كل الي حواليك و بقلبك و انا ممنوتك كتير لكل هل المودة الي حاسستها منك و صدق الي قال : القلب عى القلب :zzz

  16. منى 10 May 2010

    هلا غيوثة :)
    من زمان ما بنتي و لا طليتي , ان شاء الله تكون كل امورك ميسرة و بخير

    كل سنة و انت كمان بخير و صحة انت و اهلك و اولادك و ابو الشباب و كل واحد قريب الك و من قلبك

    و كمان الف هنا لكل شي عم تساويه من هون ;)

  17. منى 10 May 2010

    هلا فرفوشة :)
    اي ان شاء الله على طول , و منورة دوما :grin

  18. منى 10 May 2010

    هلا بشورة :)
    ان شاء الله تجربيها و تعجبك و انا رح استنى رايك

    كل سنة و انت بخير و ان شاء الله السنة الجاي بتكون تحقق شي مهمو حلو كتير ببالك ;)

  19. semo 10 May 2010

    أول ي عقبال ال300 سنة يارب والله حاسة اني بعرفك وعايشة معك من أكتر من 3 سنين مع اني بعرف هالموقع من شي سنة ونص بس
    بس بصراحة اللي بيدخل على موقع لقمة طيبة مستحيل يمر عليه هيك مرور الكرام
    الواحد بيحس أنو ببيت عربي أصيل كبير وشرح وفي بحرة صغيرة بالنص عم توزع للبيت من عطرا
    والغرف مزينة بجواهر من كل البلدان وبلمسة حضارية واللي بيميز هالبيت أنو كل الجواهر اللي فيه أصلية 100%
    الله يعطيكي الصحة ويطولنا بعمرك يارب ويخلي جوزك وولادك وما تشوفي شر باللي بتحبيهن وبيحبوكي يا أحلى منوش بالدنيا
    أما بالنسبة للوصفة حاسستا من الوصف عم تدوب بتمي
    صحة وهنا عقلب اللي أكلوهايارب
    بتعرفي اجتني فكرة هلأ مشان نحس بطعم الكريمة أكتر وبنفس الوقت نحافظ عالكيك متل ماهو أنو نحط الكيك بقالب أكبر منو بشوي ونخلي الكريمة تنزل عالجوانب والوجه

    مرة تانية كل عام ولقمة طيبة أطيب وأطيب

  20. ميس الريم 10 May 2010

    كيفك منى
    كل سنة وانت طيبة واللقمة من ايدك أطيب و أطيب
    الله يسلم ايديك
    بصراحه صار عندي فضول لأعرف المفاجأة وعلى فكرة أنا من حلب
    وشوشيني شو هي المفاجأة؟؟ :?

  21. karamela 10 May 2010

    السلام عليكم اخت منى
    انا شفت الصبايا عم يعايدو لقممة طيبة ويعايدوكي بهي الصفحة فقلت واجبي وحقك علي عايدك متلن
    ان شاء الله كل عام وانت وهل الموقع الحلو بالف الف خير
    انا كنت معكن صرلي شهور بس من كم يوم قررت اني صير اقرب اكتر واكتر لانو شي بشرفني كون بهالعيلة الحلوة
    بتعرفي اخت منى انا متوقعة شي للمفاجأة وبتمنى يكون حدسي صح
    بكل الاحوال الله يوفقك ونحنا رح نكون اول داعمين الك لانك بتستاهلي اذا كان حدسي صح
    وشكرا على كل شي

  22. freesoul 11 May 2010

    كل عام وانت بخير يا لقمة طيبة .كل عام وانتي بخير يا احلى منى بالعالم
    حتى جوزي وولادي بيعيدوكي وان شاء الله ينعاد عليكي بالخير والمسرات.ما فيني انكر فضل لقمة طيبة على كتير .وكان على طول يتنقل معي وين ما رحت من بلد لبلد ويونسني في غربتي.
    قد ما كتبت وحكيت ما فيني وفيكي حقك يا منى .انتي احييتي فينا الاكلات الحلبية التراثية وزدتي عليها اطباق عربية وغربية شي منعرفه وشي ما منعرفه
    الله يزيدك ويباركلك محبة الناس الك يللي جمعتيهم على الخير والمحبة
    واخر شي حابة اقوله انو عيد ميلاد لقمة طيبة بيوافق عيد ميلادي 5.ايار :zzz
    بس هو صار عمره 3 سنين بس انا عمري صار 8)

  23. لارا مينا 11 May 2010

    تسلميلي والله أخت منى وأنا كمان لما أقرأ ردودك ببتسم لا شعوريا وكأنك عم تكلميني وجها لوجه.. وعلى فكرة الوصفات إذا كان فيها بالمقدمة أخطاء بالكتابة أو صياغة الألفاظ ياليت تعدليها وأنا معطيتك الصلاحيات ميه بالميه تعدلي فيها وتضيفي وتنقصي مثل مابدك . وألف شكر سلف .

    وأنا عندي مجموعة اقتراحات للموقع حتى لو تنفذيها بالمستقبل البعيــــــــــــــد خصوصا مع مشاغلك الحاليةإلي مابتنتهي وأنا كنت ناوية أرسلها من زمان بس كل يوم أقول اليوم إلي بعده:

    1)لو ينضاف قسم للموقع اسمه ( مواسم ) نحط فيه كل نوع فاكهة أو خضرة مع صورته والشهر أو الأشهر إلي المفروض بينوجد فيه سواء في بداية الشهر أو منتصفه أو آخره حتى كل وحدة تفيد عيلتها وأولادها من ناحية الصحة وتطبيق للدين كمان .

    2) لو يضاف قسم اسمه ( مسميات )ونحط فيه صور لأنواع الفواكه والخضار والورقيات والحبوب وحبوب البهارات المختلفة إلي ما يعرفوها الناس ودا يما بنحس فيه سوء فهم مثل حب القمح المقشور والحنطة والجريش ولما أروح السوبر ماركت دايما ألاقي فواكه وخضار ما أعرفها ممكن تكون مستوردة وأتمنى لو حد يساعدني فيها وطبعا بما إن الموقع فيه أعضاء كرام من كل أنحاء العالم ممكن يحطوا صور لأشياء ممكن تكون معروفة عندهم وإحنا لا ,, وأكيد كل وحدة مثلا بضيف الاسم المشهور عندها حتى تخدم الناس من منطقتها زي عندنا الزنجبيل المطحون بنسميه ( حوار )_ والسفرجل كنت أشوفه على طول ومفكرته نوع جواف ( أكيد رح تضحكوا عليي ) لأن إحنا ما نستخدمه أبدا ابدا المهم لما حطيتي وصفاتك عنه سويت بحث في جوجل واتفأجأت إنه المحروس بعرفه من زماااااااااان والتمر الهندي أتمنى أشوف صورته طبيعي لأن بينباع عندنا مجفف .

  24. لارا مينا 11 May 2010

    3) لو يضاف قسم اسمه ( أجهزة ) ويكون فيه الأجهزة الضرورية جدا جدا جدا ومش حيا الله أي شيء يعني نهتم بالكيف مش الكم وطبعا أنا ما أقصد الفرامة أو الطحانة نهائي ,,,,,,,,,,, مثال عصارة الجزر أحسها ضرورية جدا ويمكن أهم بكثير من المايكروويف لأن والدي جابها من
    أكثرمن 15سنة ومن يومها وإحنا نشرب عصير جزر وقبلها ما كنا نشربه أبدا أبدا بصراحة بتخلي طعم العصير وقوامه مختلف وبدون إضافة نقطة ماء وفي خلال 5 دقايق بس بيكون عندك 5 لتر من العصير بيقدي للكل وبيزيد.

    4) يضاف قسم اسمه ( طوارئ ) ينحط فيه نوع مشروب أو أكل بسيط جدا جدا ويكون مجرب من معظم الناس يعني متداول, لبعض الأمراض البسيطة وطبعا ما أقصد إن نتعدى على مجال الطب والأطباء وتخصصهم( أعوذ بالله ) ولا أقصد نجربها على الأطفال أكيد يعني شيء خاص بالكبار … مثلا عندكم مشروب الزهورات مشهور ومفيد ومجرب وعندنا مشروب القرفة الدافئ على طول يعطوه للنفاس والكل بيشربه وما منه خوف وأيضا الأرز الأبيض المسلوق من دون أي إضافة حتى الملح ومعه كم ملعقة زبادي مفيد للإسهال وهذا بينصحوا بيه الأطباء ومن هالوصفات إلي بتكون مكوناتها عادية وأكيد إذا مانفعت مارح تضر بإذن الله وكلنا واعين ومتعلمين ولله الحمد.

    وطبعاهالإقتراحات صعبة تعمليها لوحدك أكيد وأنا أفصد إن كلنا نتشارك ونتعاون فيها لحتى نفيد ونساعد الناس ويكون الموقع مثل المرجع أو 911
    :grin خصوصا البعيدة عن أمها أو أهلها
    ,, وسلامتك .

  25. منى 11 May 2010

    سلام لارا :)
    يا ستي الوصفات بيجننوا متل ما هنن :zzz

    بالنسبة لاقتراحاتك , اول واحد و التاني سبحان الله كان في الهم مسودة من اول ما تم افتتاح الموقع و نفس الفكرة خطرت الي من كم يوم لنفس السبب الي ذكرتيه و هو اختلاف الاسماء حسب المناطق من جهة و التركيو على اكل الخضار و الفوكاهة بوقتها بس من جهة تانية

    الاقتراح 3 كتير مهم , حتى من ابسط شي , ممكن حتى نتناقش في ماركة معينة لحتى الكل يستفاد و الي جرب يخبر الي ما جرب :zzz

    الاقتراح 4 مميز و اذا بتقبلي انك تكوني المسؤولة عنه , اكيد بمساعدة من الكل , من بكرة بيكون في هيك قسم ..

    شو رايك :zzz

  26. منى 11 May 2010

    هلا فروحة :)
    هي على الصفحة الرئيسية :roll كيف لكن !

    و الله يا فرح ما حسيت انك معنا بس من 9 شهور , حاسة من قبل بكتير , الله يديم المحبة على طول و الله يديم هل اللمة الحلوة :zzz

    ان شاء الله تجربي الكيك و يعجبك و كمان تكن المفاجاة التانية مستاهلة 8)

  27. Mays 12 May 2010

    ما بعرف كيف راحت عليً المعايدة مع إني من أول شهر أيار ما دخل قلت لازم يكون في شي مميز من منى للمناسبة ، يس مرت الأيام و انشغلت ومع إني من كم يوم طليت على صفحة الكاتو بس ما انتبهت للوصفة :cry

    على كل حال كل عام و الموقع و صاحبته و كل العضوات بألف خير و عقبال مية سنة و الله يديم جمعتنا الحلوة على الخير إن شاء الله.

    يعنى شو ما حكينا عن الموقع و صاحبته بيضل قليل بالمقارنة بالمجهود الجبار اللي عم يتقدم و أهم ما بيميز الموقع برأي هو حبك للإتقان و إنو يكون كل شي على أصوله و مميز و مرتب و أكيد بيبيض الوجه و هاد الشي أكيد إنعكس على كل الأخوات اللي بيرسلوا و صفات ، بحس إنها فعلا طالعة من القلب و بتوصل للقلب دغري ( و للمعدة طبعا) :grin

    و منوصل للوصفة ، الفكرة أكيد مميزة ياستعمال الكاتو بدال البسكوت و خاصة إذا كان على شوكولا.
    بس أنا بدي قلك ملاحظة من خلال تجربتي المتواضعة بالشيزكيك البارد ، إنه تستعملي جيليه بدون نكهة و لون حتى تبين طعمة الجبن و الكريم بوضوح و ما يطغى عليها أي نوع تاني.
    كمان شغلة ، جربتي مرة الشيزكيك بجبنة الريكوتا، كتير طيب و تغيير شكل و بيعطي قوام مختلف للكريمة و أكيد أخف.

    و طبعا مستنين المفاجآت على أحر من الجمر ، مع إني مو نازلة ع حلب بالصيفية
    شكلي صايرة كتيرة حكي :roll ، يالله خلصت ، سلامت و كل عام و الكل بخير :)

  28. هادينة 12 May 2010

    ان شاء الله كل سنة وانت ست منى وكل الاعضاء والمشاركين بالف صحة وعافية والله يديم هاللمة الحلوة ويسعدكن :)
    صار موقع لقمة طيبة من المواقع اللي لازم اتصفحها بشكل يومي ان شاء الله دايما منورة موقعك والك مني هدية وصفتين صغنتوتين وحلوين قريبا ان شاء الله ;)

  29. لارا مينا 12 May 2010

    مساء الخير , أكيد أخت منى ببقبل أكون المسؤولة عنه ,

    وهذا بيشرفني أكيد وبمساعدة الأعضاء الكرام طبعا لأن كلهم بيستاهلوا الواحد يشتغل علشانهم,

    وأنا حاضرة لأي شيء في سبيل تقدم الموقع للأمام لأن قلتها لك من قبل وبعيدها اليوم

    هو أول موقع أو منتدى بكتب فيه وبشارك بشكل رسمي والباقي كنت مجرد متصفحة ( لا أكثر ولا أقل ) من أكثر من 10 سنوات … ولا عمري كتيت فيها حرف واحد حتى مجرد التسجيل ماكنت مسجلة , سبحان الله ماكانت تدخل مزاجي , يمكن علشان احترام الأشخاص أحسه بيكون فيها أقل وتقريبا نوعية بعض الأعضاء ماكانت أفكارهم تعجبني .

    وسلامتك .

  30. نور الأسلام 12 May 2010

    السلام عليكم كيفك منى مشتاقتلك كتير كتير انشاء الله تكونو بخير جميعا :) كل سنه وكل يوم لقمه طيبه بالف الف خير وعقبال المية سنه :zzz وانشاء الله ايامك كلها فرح واعيادوسعاده

  31. haya 12 May 2010

    مرحبا اخت منى كل سنة ولقمة طيبة في تقدم باذن الله
    ما شاءالله عليك وعلى التعليق اللي كاتبتيه فوق نحن فعلا كلنا خوات بالرغم من انو ما بنعرف بعض بس فعلا الموقع كثير حلو ما شاءالله عنه ان شاءالله يكون في تقدم مستمر
    يا ستي هالوصفة شكلها كثير رائع وان شاءالله راح جربها باذن الله ، بس في عندي سؤال حابة اتأكد منه انت قلتي انو فينا نستعمل الكريما الفريش طيب كم مقدارها راح يكون وشكرا الك انا اسفة اني دائما يعذبك بأسئلتي الكثيرة بس مثل ما قلت لك انا بحب اتأكد من كل شي قبل ما اشتغل

    اخت منى انت الك فترة ما عم تنزلي اي وصفة جديدة الك انت اللي من تجاربك لأني بصراحة بحب وصفاتك كثير كثير وطبعا وصفات الاخوات كمان رائعة وبحب جربهم كثير
    المهم انو ربنا يوفقك ويعطيك القوة والصحة ويظل موقع لقمة طيبة بتقدم مستمر

  32. منى 13 May 2010

    هلا جمان :)
    مية هلا فيك و ان شاء الله يكونوا الصفات تمام و على زووءك و اتمنى تبقي معنا على طول ..

    نورتينا و شرفتينا و كل سنة و انت بالف خير

  33. منى 13 May 2010

    هلا سمسومة :)
    يا الله شو حبيت تعبيرك , ايه عن جد حلو كتير و انا كمان بحسه هيك و بتمنى الكل يحسه هيك :zzz

    خليلي عينك احلى دعوات و الله , ان شاء الله انت كمان

    فكرتك حلوة كتير , اذا جربتيها خبريني شو رايك ممم , جعت :grin

  34. منى 13 May 2010

    هلا ميس :)
    و انت بخير ان شاء الله .

    لااا ما بوشوش , اصلا التناجي حرام :grin

  35. larooo 13 May 2010

    كل عام والموقع وصاحبة الموقع اللي مافي منها منى
    وكل الحبابات والحبابين المشتركين بالف خير
    وان شاء الله عقبال المية بس ياريت الاحتفال وقتها
    يكون بشي نوع شوربة ..يعني تحسبا لامكانياتي وقتها :grin :grin
    عنجد انا كتييير مبسوطة ..وعنا اليوم مطررر كتير حلو بالنمسا ..خرج هيك قطعة مع كاسة شاي سخنة ياسلام ;)

  36. Rino 13 May 2010

    عزيزتي منى
    الله يسعدأوقاتك و يهنيكي بنجاح موقعك و ربي يجعله ثمرة مباركة في شجرة نجاحاتك الدايمة و اللي بكل صدق بتستاهلي التهنئة عليها
    شهادتي بإنسانة متلك مجروحة لكن كلام الحق لازم ينآل أنتي عملتي بصدق وأمانة ونية صافية و بذلتي جهود كبيرة بتوصيل الموقع لهالمستوى من النجاح والتميز و بفضل الله أدرتي تجمعي بها الموقع باقة من خيرة الستات اجنمعوا كلون عالمحبة والصدق الله يبارك فيكي و فيهون
    بباركلك و ببارك لكل الأخوات الغاليات و دايما عالمحبة والصدق بنلتقي بإذن الله
    سامحيني منى على غيابي اللي عم بيطول ظروفي صايرة صعبة شوي بس أنا دايما بينكم حتى ولوكانت مشاركاتي قليلة
    وأنا بانتظار مفاجأتك و لو أنو عندي إحساس إني عرفتا
    بالتوفيق بإذن الله

  37. منى 14 May 2010

    هلا كرميلا :)
    مية هلا فيك بالموقع اخت جديدة و كريمة , بيتك و مطرحك متل ما بيقولوا :zzz

    صار عندي فضول اعرف حدسك :grin

    بكل الاحوال الف شكر الك للرد و للكلام الي فيه و اتمنى تبقي معنا على طول و كمان الف هنا على كل الوصفات الي جربتيها

  38. بشرى 15 May 2010

    منمون أديه كمية الكريما الفريش اذا حبينا نستعملها ؟ :zzz

  39. gsm 17 May 2010

    السلام عليكم منوش من شان الله ما تواخذيني كتيير تأخرت عليك إن شاء الله ألف مبروك للقمة طيبة وإن شاء الله تكبر هل اللقمة الطيبة أكتر وأكتر وتزيد تألق ونجاح يا رب انا تأخرت عليك وصرلي زمان ما عم ادخل على الموقع مرت علي شوية شغلات يعني ولادتي وجيبة حمودة أفندي ويللي قلبلي حياتي رأسا على عقب :x وما بقى أعرف ليلي من نهاري بقى يا ريت تقبدلي هل العذر :zzz ويكون مقبول
    نجي على الأكلة
    يعني إنتي ما بتعرفي قديش بموت على شي إسمه تشيز كيك وكذا مرة جربت كذا طرية وما عم أوصل على النتيجة يللي بدي ياها بس يني وبينك بدي أأجل أعمل هل الجاتو لأنو أسهم الميزان ما عم تشجع بعد الولادة :upset :sigh :sigh
    بس انا واثقة إنو رح تكون كتيير طيبة لأنو الوصفة أخدتها من أشطر شيف
    صحيح نسيت أتشكرك لأنو لو تعرفي قديش هل الوصفات تبعوتك بيضتلي وجي قدام بيت حماي وخصوصي وصفة بسكويت جوز الهند كتيير حبوه ونال إعجابن وكمان كرات الدجاج المقرمشة ووصفات كتييرة ما بقى أتذكرها
    انا يمكن طولت عليك بس يعني لأنو عن جد إشتقتلك وإن شاء الله أرجع عما قريب بمشاركات عن أكلات ووصفات تعلمتها بس شي أعرف ليلي من نهاري :p :p :p :p :p

  40. منى 17 May 2010

    هلا freesoul :)
    و انت بالف خير , انت و كل عيلتك فرد فرد و كمان كل الغوالي على البك

    و انا كتير ممنتك للثقة و مبسوطة اني كون جزء لطيف من حياة كل واحدة فيكن , ربي يديم المعروف و الخير دوما

    كل سنة و انتي سالمة , بلاها الاعمار , اصلا انا من بعد 22 سنة عم انسى اكبر :grin

  41. منى 17 May 2010

    هلا لارا :)

    ممكن اتواصل معك على الايميل ;)

  42. هادينة 18 May 2010

    السلام عليكم منى انا بعتلك وصفة على الايميل بس حبيت اسال اذا وصلتك :?
    يعطيكي الف عافية هالوصفة شكلها كتير طيبة متل كل وصفاتك :) ان شاء الله دايما منورة موقعك

  43. منى 19 May 2010

    هلا هادينة :)
    كل سنة و انت بصحة و االف خير , شكرا كتير لذوقك أختي :) و ان شاء الله معنا على طول

    يا ترى شو الوصفات الي بعتيها :?

  44. هادينة 19 May 2010

    الوصفة هي سمكة سالمون بالفرن مع وصفة صلصلة الطحينة جنبها بعتتها على ايميلك
    اذا ما وصلتك ممكن تخبريني وين لازم ابعتها :? شكرا كتير

  45. DOUHA 19 May 2010

    مبروك منى ميارب كل يوم بيزيد الموقع باشياء مميزة
    فكرة القالب جديدة والاغلب رح حبا اكتر من طبقة البسكويت
    ممنونة

  46. منى 19 May 2010

    تسلميلي يا ضحى :)
    ان شاء الله تجربيه و تحبيه , خبريني شو بيصير معك

  47. منى 19 May 2010

    هلا هادينة :)
    كنت رح ابعت الك ايميل سبحان الله :)

    الوصفات وصلوا , بس ما قدرت افتح الملف , ممكن تبعيهم مرة تانية بس كايميل عادي من دون ملف

    عزبتك معي :roll

  48. منى 19 May 2010

    هلا Mays :)

    هي تالت مرة بكتب الرد و لما اجي ابعته بيصير معي شي ,بقى ان شاء الله التالتة ثابتة :roll

    بالفعل متل ما قلتي , الاحظ اغلب الاخوات الي بيبعتوا الوصفات بيراعوا التفاصيل , سبحان الله هي شغلة مهمة كتير برايي و خصوصا لما بتكون الوصفة جديدة

    ميوسة بتعرفي الجيلو الي من دون نكهة قليل كتير تلاقيه عنا و حبيت تكون الوصفة بمكونات متوفرة عند الكل :zzz

    ممكن تعلميني طريقتك في التشيز كيك ؟ قصدي طريقة الريكوتا ;)

  49. منى 19 May 2010

    هلا نور :)
    ايامك ان شاء الله كلها خير و افراح و سعادة .

    من زووءك نور و انا مشتاقة الك كتير كمان , ان شاء الله تبقي بخير

  50. سارونات 23 May 2010

    السلام عليكم و رحمة الله و بركاته

    منوووش اشتقتلك كتير و اشتقت للموقع اللي يمثل بيت انترنتي بالنسبة النا بتحسينا هيك قاعدين مع بعض حوالين الطاولة و عم نحكي
    الله يديم هالجمعة علينا يا رب

    منووشة أمي بتسلم عليك كتير و الها طلب هي بدها وصفات للبسبوسة بأنواعها يعني اللي بالسميد و اللي بجوز الهند و السمسم لان داقتها و كتير عجبتها اذا فيكي تساويلنا مهرجان للبسبوسة :grin راح كتير تفرحيها و اذا مو ممكن بس وصفة واحدة بتكفي

    الله يوفقك و يسهل دربك

    سلام

  51. Mays 24 May 2010

    بعتذر منك كتير منى لإني هلق شفت التعليق
    و ياستي و صفة شيزكيك الريكوتا كالتالي: ;)
    100 غرام بسكويت سادة
    50 غرام زبدةمذوبة
    ملعقتين كبار قشطة نستلة
    توضع مع بعض بالفود بروسيسور حتى تتماسك قليلا

    300 غرام ريكوتا بدون ملح أو ملح قليل
    4 حبات كيري
    بقية علبة القشطة
    ظرف كريمة بودرة ( دريم ويب)
    فنجان قهوة سكر
    ملعقة صغيرة فانيليا
    ظرف جيلاتين بدون نكهة مذوب بفنجان قهوة ماء حار جداً

    كمان توضع جميع المقادير أعلاه بالخلاط ماعدا الجلاتين اللي منضيفه بعد ما يبرد شوي و منخلط بس خلطة صغيرة
    طبعا بدو بالبراد 3 ساعات على الأقل
    و نحنا كل واحد بالعيلة ذوقه شكل ، الأولاد بيحبوه عليه صوص شوكولا و زوجي بيحب مربى الكرز و أنا بحبه بدون شي ومشان هيك كل ما بقسم قطعة بحط فوقها الزينة.

  52. محبةالمصطفى ملك 11 June 2010

    كل سنة و انت بألف خير يا منوووووووووووش (معلش لو متأخرة شوي :p )
    و فعلا موقع كتتتتير مميز و حلو

  53. سانتاريتا 14 September 2010

    يسلمو اديكي يا احلى منى والله يعطيكي العافية وكل سنة وانتي سالمة بمناسبة عيد الفطر تعرفي انا من زمان بتابع لقمة طيبة بس اليوم سجلت
    :p ههه خصوصي لاعايد عليكي وان شاء الله في تقدم وتالق دائم حبيبتي وعلى فكرة انا من حلب ومقيمة في ابوظبي وعلى طول بنصح رفقاتي يتابعو موقعك لانهم بيحبو لقمتنا الطيبة الطبخ السوري والحلبي خصاصة
    تقبلي مروري وتحياتي [B]null[/B] :)

  54. منى 16 September 2010

    و انت سالمة اختي :)
    نورتي و شرفتي مية هلا فيك و بكل رفقاتك و انا كتير مبسوطة انك سجلتي و شاركتي , ان شاء الله بتبقى على طول معنا :)

    هلا فيك

  55. gharam 20 September 2010

    مرحبا ست منى انا ارسلتلك من كذا يوم تعليق ومارديتي علي ياريت لو تردي علي انا كتير حابه اسوي التشيز كيك بس انا مقيمه في فرنسا وهون متل مابتعرفي الجلي مو دائما واحد بيلقاه حلال لهيك بدي وصفه تشبز كيك بدون جلي بليز والله اني كتير مشتهيه اعملو

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)