حلى الفريز بالكاسة


         وصفة : منى                 2013/05/10                 2 تعليقات
حلى الفريز بالكاسة

من وقت ما بيجي الفريز لوقت ما يروح لازم كل كم يوم حضر شي جديد فيه , عشقي و غرامي هل النوع من الفواكهة , رومانسي و ناعم و حلو و طيب و بيدوب بالتم و لونه أحمر و قلبه زهري و كمان ما فيه كالوري متل كل شي حلو بهل الدني , هو لالي كل شي بحبه بأكلة .

عملت كيك سادة و خطر ببالي حضر منه شي جديد بالفريز , حضرت كاسترد , قطعت فريز و رشيتهم بشوية سكر و خليتهن يرتاحوا شوي لحتى يطالعوا من عصيرهن الحلو , قطعت الكيك على أد الكاسات و حطيت شرحة كيك و رشيت عليها من مية الفريز , و فوقها شرحات فريز و فوقهن كاسترد , و منعيد , منخليهن شوي بالبراد و وقت التقديم شوية شوكولا على الوج , مم ممم ممممم , الاغراء كله ادامي بكاسة واحدة ما في أطيب من هيك , بصراحة مع هيك حلو الواحد ما بياكل منه , الواحد بيدوب فيه .

طلبت مني الاخت Bayan Al-taleb وصفات حلويات ما بدها فرن , و هي رح تكون أول وصفة بهل المجموعة في حال استخدمتي كيك جاهز أو أصابع ليدي فنجرز جاهزة أو حتى بسكويت عادي , بهيك حالة الوصفة ما بياخد تحضيرها معك أكتر من ربع ساعة و على السريع وصفة حلو للحلوين .
بالصحة و الهنا

شو لازمنا ؟

 

2 – 3 كوب فريز طازج , مقطع شرائح سميكة نوعاً ما

ربع كوب سكر

1 ملعقة كبيرة عصير ليمون

شرايح كاتو اسفنجي سادة أو ليدي فنجرز أو بسكويت سادة

شوكولا مبشورة , حسب الحاجة

الكاسترد :

2 كوب حليب

بيضة

ربع كوب سكر

2 ملعقة كبيرة طحين

فانيليا

1 ملعقة كبيرة زبدة

طريقة التحضير

ツ يقلب الفريز و السكر و يترك جانباً حتى اعداد الكاسترد .

ツ يحضر الكاسترد : يقلب الحليب و البيض و الفانيليا و السكر و الطحين بمضرب سلك حتى يتجانس المزيج جيداً .

ツ يوضع مزيج الكاسترد على نار متوسطة و يقلب الكل بمضرب سلك حتى يغلي المزيج و يسمك .

ツ يبعد الكاسترد عن النار و تضاف الزبدة و يقلب حتى تذوب الزبدة و تمتزج مع الكاسترد . يترك جانباً حتى يفتر مع التقليب كل بضعة دقائق حتى لا تتشكل قشرة على الوجه .

ツ يقطع الكيك لشرائح بسماكة 1 سم تقريباً , تقص الشرائح على حسب حجم الأكواب . توزع شرائح الكيك في الأكواب .

ツ يمزج عصير الليمون مع شرائح الفريز , يوزع القليل من عصير الفريز على الكيك بالاضافة إلى بعض من شرائح الفريز , يغطى بالكاسترد الفاتر و ترش بالقليل من الشوكولا , ثم تكرر العملية .

ツ توضع الأكواب في الثلاجة لمدة ساعة على الأقل , ترش بالشوكولا المبشورة و تقدم

التعليقات

  1. ديما 26 March 2014

    يمي يمي كتير طيبة لااااازم جربا

    • منى 5 April 2014

      ان شا الله تجربيها و تحبيها , خصوصي هلا وقتها , اذا صار ما صار خبريني رايك :)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 4.00 out of 5)