دونات مافن


         وصفة : منى                 2013/04/22                 12 تعليقات
دونات مافن

كتير مننا بيحب الدونات بس بيتكاسل على تحضيرها , عجن و تخمير و كمان قلي , لكل الي مو جاي على بالهن يقضوا نص اليوم بالمطبخ و بنفس الوقت جاي على بالهن , او على بال قط صغير نقاق عندهن بالعيلة , هل الوصفة حفر و تنزيل .

مزيج المافن بعد ما يتحضر رح يكون شوي سميك , منصبه بقوالب الكب كيك الي مغلفينهن بالورق البليسيه لان حشوة المربى فيهن رح تغوص شوي و اذا ما استخدمت الورق ممكن يلزق المافن بالقالب . و أطيب الشي انك تقدمي هل المافنات سخنات , بياخدوا العقل , و حتى للي مو صحبة مع الحلو متلي رح يعجبهن كتيررر .

في المقادير رح تشوفي مكتوب كوب مزيج من حليب و لبن , ما عرفت عبر عن الفكرة غير هيك , المهم انك بتحطي معلقة كبيرة مليانة لبن في الكاسة و بتكملي بالحليب لحتى تكملي الكاسة , هيك صار عنا مقدار كوب من السائل و هو مزيج من الحليب و اللبن . و الحليب الافضل ان يكون بحرارة الغرفة أو مسخن على الميكروييف , اذا كان في كهرباء , شي كم ثانية


عم شوف كانه الصبايا عم يفضلوا ان يكون التفاعل على الفيس بوك اكتر من الموقع هون ، و انا لهل القصة بالذات عملت ان ممكن الواحد يضيف تعليق عن طريق الفيس بوك … بس شو ، لا تنسوا انكم اولا و اساسا من عيلة اللقمة , و كتير بنبسط لما بشوفكن هون بالاسماء الي اتعودت فيها عليكن



بالصحة و الهنا

شو لازمنا ؟

1 بيضة كبيرة
ثلث كوب زبدة مذوبة , 80 غ
كوب مزيج حليب و لبن
فانيليا
2 كوب طحين حلويات
2 ملعقة صغيرة بيكنغ باودر
ثلثي كوب سكر

الحشوة :

نصف كوب مربى فريز
نصف ملعقة كبيرة كورن فلور أو نشاء

للوجه :

نصف كوب سكر بودرة
رشة فانيليا
ربع كوب زبدة مذوبة
طريقة التحضير

ツ توضع مقادير الحشوة على نار هادئة و تقلب حتى تسمك . تترك حتى تبرد و تقلب كل بضع دقائق كي لا يظهر على سطحها قشرة سميكة .
ツ تجهز صينية كب كيك و توزع أكواب ورقية في عيون الصينية , يحمى الفرن على درجة حرارة 180 درجة مئوية .
ツ ينخل الطحين مع البيكنغ بودر و رشة الملح و يوضع في وعاء كبير , يضاف السكر و يقلب الكل .
ツ تقلب البيضة و مزيج الحليب و اللبن و الزبدة و الفانيليا بمضرب سلك لبضع دقائق حتى تصبح مزيجاً واحداً , يمكن استعمال كوب الخفق أو المضرب العمودي .

ツ يضاف السائل على الطحين المنخول , يقلب بلطف حتى يتجانس فقط من دون زيادة في الخفق .
كريم عم يخفق المافن لماما


ツ يوزع حوالي ملعقتان صغيرتان في الأكواب الورقية , توضع ملعقة صغيرة مسطحة من المربى و تغطى بملعقة أخرى من مزيج المافن .

ツ تخبز الصينية في الفرن على الرف المتوسط لمدة 25 – 30 دقيقة , تخرج من الفرن و تترك لبضع دقائق حتى تهدأ حرارتها .
ツ يمزج السكر و الفانيليا , تدهن حبات المافن الساخنة بالزبدة أكثر من مرة حتى تنتهي كل كمية الزبدة , ترش بالسكر و تقدم فوراً دافئة .

فكرة :

يمكن استخدام الشوكولا كحشوة عوضاً عن المربى , يضاف عندها القليل من القرفة للسكر البودرة .

التعليقات

  1. احمدوووش 22 April 2013

    سلاااام ..
    الوصفه مره حلوه .. ياترى اقدر اعملها في صحن عااادي ..وكيف اقدر اتفادا ان المربى ينزل ويحرق @_@

    • منى 22 April 2013

      هلا اخ أحمد , قصدك قالب عادي ؟ اذا هيك فلا ما بتقدر , اصولها تكون بقوالب المافن أو الكب كيك .
      المربى رح ينزل شوي , ما في داعي نتفادى هل القصة , رح يصير بنص القالب تمام و ما رح يحترق ان شاء الله

  2. 7ayah 22 April 2013

    يا سلاااام .. هالوصفة اجت عالوجع ^_^

    وقت بشتري الدونات المحشي بختار دائماً المحشي بشي متل الكسترد .. بس يممي شو لزيييز .. طمعتو طيبة متل الكريمة ..
    أو بالمربى متل وصفتك أو صوص التفاح أحيانا .. و أكيد فكرة الشوكولا أو النوتيلا رووووعة ..
    كمان فكرة .. ممكن مزيج من النوتيلا مع زبدة الفستق لعشاقا :)

    • منى 23 April 2013

      يممم , الدونات طيب كتير , حتى لو صسادة , بقى كيف ع كل هل الاشيا الي قلتيها , ممممم

      رح استنى رايك حياة , ان شاء الله يعجبك

  3. souha 24 April 2013

    شكلها بيشهي يسلم الأيادي

  4. dede soori 25 April 2013

    السيدة الفاضلة منى
    رجاء ومن بعد إذنك أريد وصفة الكعك السخانة الحلبي اللي كان نشتريه من فرن الجديدة وباب النصر

    • منى 28 April 2013

      هلا dede , انا ما عندي وصفة ظابطة اله , من كم يوم عطاني شيف وصفة , رح جربها و اذا ظبطت فوراً بتنزل على الموقع ان شاء الله :)

  5. رنا 29 April 2013

    وصفة خطيرة ورائعة كالعادة …رح جربها اول ماجيب صينية للمافن لانه الي عندي صغيرة كتييير بتعل القلب …واكيد مالنا غنى عن احلى لقمة

    • منى 29 April 2013

      ان شاء الله تجربيها و تكون على زوءك رنونة , رح استنى رايك

  6. شهرزاد 4 May 2013

    مرحبا ست منى، انا متابعة قديمة لهل الموقع الرائع ، تسلملي شو بحبك انت و وصفاتك الطيبة، هلأ عملت هل المفنات و ريحتهم كتير طيبة و رح خبرك عن الطعم الي ان شاء الله يكون طيب كمان بس عندي سؤال انا هلأ عم شوفهم و هم بالفرن و شايفة انه المربى طلع شوي على الوجه! و في منهم طلع شوي على الجوانب و في منهم شكلهم كتير حلو مع هل المربى الي طالع منهم )
    عادي؟ ولا شو غلطتي؟
    شكرا كتير

  7. الدمشقية 29 April 2014

    رائعة فعلاً

تقييم الوصفة
عاديةقد أحضرهاجيدةممتازةأكثر من رائعة (10 votes, average: 3.80 out of 5)