سلطة العدس و الباذنجان المشوي


         وصفة : منى                 2011/09/18                 15 تعليقات
سلطة  العدس و الباذنجان المشوي

انا مو كتير صحبة مع البانجان بس هلا صايريين صحاب كتير و عم اكله بكتير طرق , مشوي مع قطعة بندورة و مخلل قتة . مقلي مع رشة كمون و فليفلة , سلطة , متبل , فتة , محشي , مسقعة , يعني فاقس كيفي عليه هل الصيفية .

العدس بحبه كتير كمان شو ما كانت طريقة طبخه و هل الوصفة الغريبة و الجديدة جمعتلي التنين , عدا عن انها مغذية و صحية , طعمتها كتير كتير طيبة و دبس الرمان مع بقية التوليفة عامل نكهة مميزة ….و لما بينحط هل الصحن ادامي , بستغني عن الغدا لخاطره

بالصحة و الهنا




نصف كوب عدس
2 حبة متوسطة باذنجان , مقطع مكعبات
2 حبة متوسطة بندورة , مقطعة مكعبات
نصف خسة , مقطعة
نصف باقة نعناع صغيرة , مورقة
حفنة بقلة , مورقة
كوب بقدونس , مورقة
2 ملعقة كبيرة صنوبر , محمص

الصلصة :

حبة صغيرة بصل , مقطع جوانح
4 ملعقة كبيرة دبس رمان
2 ملعقة كبيرة عصير ليمون
6 ملعقة كبيرة زيت زبتون
ربع ملعقة صغيرة فليفلة حمراء ناعمة
1 فص ثوم , مهروس
ملح






• تخلط مقادير الصلصة و تترك جانباً . يغسل العدس و يسلق لمدة 15-20 دقيقة حتى ينضج ثم يصفى .

• يقلب الباذنجان مع القليل من زيت الزيتون و يتبل بالملح و الفلفل و تشوى بالفرن و تقلب عدة مرات حتى تنضج . يترك جانبا حتى يبرد .

• يقلب الباذنجان و العدس و البندورة و الصلصة في طبق صغير . يضاف المزيد من عصير الليمون حسب الرغبة .

• يوزع الخس و النعناع و البقلة و البقدونس في طبق التقديم . يوزع العدس و الباذنجان و البندورة و تنثر حبات الصنوبر .

• تقدم السلطة مع الخبز العربي الطازج أو المحمص .

التعليقات

  1. آرام 18 September 2011

    يا أختي أنا والبانجان صحبة من زغرنا … وسوا ربينا … وقصة حب وعمر وذكريات.

    بحبه بكل أشكاله وألوانه وتنويعاته، وبالإضافة إلى الأشياء اللي ذكرتيها، في عندك المخلل والمكدوس والمكمور والكارنيارك والكباب بانجان، ولا تنسي في عندك المربى … اللي وعدتيني في يوم من الأيام إنك تنزلي وصفته :)

    أكيد رح طبق الوصفة بأقرب وقت، لولا أنو ناقصني هلأ بعض المكونات.
    ألف شكر أخت منى ويعطيك ألف عافية.

  2. farah 18 September 2011

    لأ لأ عدس وباتنجان كتير هيك حرام عليكي ضاع الريجيم
    يعني بظن هيك اكلة لذيذة بالخبز اياً كان نوعه عربي او فرنسي صحيح صحوة ضميرك عجبتني بالنسبة للكالوري بس لا تنسي الخبز وعمايله :upset
    يا ستي يسلم ايديكي شكلها كتير شهية لسا ما جبت باتنجان ولما جيبه صارو اكلتين على قائمة الانتظار وانشاء الله باقرب فرصة بدي ساويهم :) واكيد مو قصدي ان العدس او الباتنجان بيسمنوا بس لأني بحبهم كتييير فأكيد بدي آكل منهم كتيييييييير وبالخبز كمان :p

  3. om nabeel 18 September 2011

    شو هالاكلة التحفة تسلم ايديك
    شكلها كمان بتنفع لللي عم يعملوا ريجيم امثالي
    تسلم ايديكي ديما الحلو ما في عندو الا كل حلو
    بتعرفي فرحانة اني اول وحدة علقت هالمرة
    :grin :grin :grin

  4. غيث 19 September 2011

    هههه والله يا ام نبيل مالك اول وحدة طلع في ناس اشطر منا هههه يالله يا ستي الوحدة حسب وقتها بقى بتتصفح النت وخاصة الان مع عودة المدارس والصغار عنا وشي بدو عصب راس الله يعين الجميع نجي على هالاكلة المحروفة ايه اشو هذا منى لا هيك بزعل منك اختراعات رائعة يعني شو بدها الوحدة تطبق لتطبق الله يسلم ايديك يا حق كلو طيب ومنفنف وباين عليها من مكوناتها انها شغلة الله يعين الميزان علينا وعلى اكلات ميمو اللذيذة قلتيلي ضمير هههه :grin

  5. om nabeel 19 September 2011

    هههههههه هالمرة كمان راحت علي ومبروك فرح بالرد الاول
    وعلى قولتك ام غياث بدات المدارس والله المستعان
    عندي كتير براسي اكلات بدن تطبيق ومنونة اكلاتها ما بتخلص بقى ياترى شو اول اكلة رح طبقها الله اعلم :x

  6. karamela 19 September 2011

    كيفكن كلكن
    والله اشتقتلكن كلكن وبالاخص منى وانا بهالفترة التهيت بكتير شغلات
    منمون تسمحيلي اسالك سؤال اهبل شوي :x
    منى ممكن تشرحيلي بالتفصيل الممل المعت كيف بتشوي البانجان بالفرن مشان الكلوريات ماتكون كتيرة :roll
    بدك تتحمليني انا محسوبة عليكي وشكرا الك سلف ;)

  7. منى 19 September 2011

    و الله اخي ارام انا صايرة صحبة معه على كبر , بس ندمانة لان ما كنت بعرفه على حقيقته من زمان

    مو نسيانة المربى … بنزله ان شاء الله قريب

    اتمنى تجرب الوصفة و تحبها و صحتين و عافية مقدما

  8. karamela 19 September 2011

    بالله منى في استفسار تاني
    وقت بتشوي بانجانة كاملة بالفرن للمتبل ياترى بتحطيها بصينية وبتتركيها لتنشوى من دون تغليف بقصدير ومن دون ما تثقبيها
    هي الاسئلة اللي بتنم على شطارتي سببها اني بحياتي ماشويت بانجان بس حابة صير اشويه لانو عم خفف
    ياترى كباب البانجان بيطلع طيب بالشوي
    الله يعيييييييييييينك على هالبلوة اللي هي انا

  9. منى 20 September 2011

    هلا كرميلا :)

    تشتاق الك العافية يا رب و انت من اهل البيت و عضام الرقبة ;)

    البتنجان قطعته مكعبات و رشيته بزين زيتون شي معلقتين تلاتة و تبلته بملح و بهار و بعدها قلبته باليدي لحتى يتغلف بالزيت و حطيته بصينية تيفال و في الفرن الرف الوسط حرارة 180 و قلبته كم مرة و ما اخد اكتر من 20 دقيقة على ما ازكر :zzz

    البانجان بثقبه و بحطه على عين الغاز على نار واطية حتى تسود القشرة من كل طرافها و بقلبه اكتر من مرة , اما اذا كانت الكمية كبيرة فبحطه بصينية تيفال على الرف السفلي على درجة حرارة عالية كتير و بقلبه اكتر من مرة حتى ينشوى

    ايا سؤال تاني على عيني و راسي و على فكرة ما بقبل تقولي على حدى من عيلتي النتية بلوة , كو انا ما بينمزح معي ابدا ها :x

  10. منى 20 September 2011

    هلا فروحة :)
    بلا ريجيم بلا يحزنون .. صح انا بريحه لضميري و حاسبة حسلابه على طول بس يعني يعني يعني ما بقدر قاوم و قول هي بلاها و هي بلاها بقى انا باكل كل شي بس خفيف و الحمد لله ماشي الحال :zzz
    ان شاء الله تجربيها و تحبيها و تكون على زووءك

  11. منى 20 September 2011

    :grin راحت عليك ام نبيل

    ان شاء الله تجربي شي و يكون طيب و يشجعك لبقية الوصفات
    الله يكون بالعون , مدارس و دراسة , صراحة ما حسيت بهل العطلة ابدا :roll

    رح استنى رايك بعد التجربة و ان شاء الله تكوني انت اول واحدة جربت الوصفة :)

  12. منى 20 September 2011

    هلا غيوثة :)
    اي و الله اول يومين عصبت راسي و روحوا و تعوا و اتوكارات و مواعيد و الحكاية كانت لايصة , بس اليوم رواااق و اول مرة من زمان استمتع بساعة من الهدوء المريح :zzz
    الله يخليلهم و يبارك فيهن و لا ينقصهم على حدى

    ستي انا بعطيه لضميري ابر تخدير متل شوي عوض قلي , سمنة يوك , حلو نو , زيت قليل و الحمد لله بينام كل يوم مرتاح :grin

  13. أم نوران 23 September 2011

    هممممممممم interesting !! :eek
    شميت ريحته من عندي من هون يمييييي لازم اروح على السوق و جيب باذنجان اساسا مشتهية على الكانيارك اعملو على طريقتك بس كاني راح اعمل هالوصفة العجيبة قبل الكارنيارك ههه :grin
    يسلمو ايديكي اختي منى شي بيشهي خصوصا اني بقتح الموقع دايما وانا جوعانة لانو بكون بدي ساوي الغدا :sigh الله يبارك فيكي و يعطيكي الف عافية .

  14. منى 26 September 2011

    اعملي التنتين , هل السلطة بيكفيها كمية قليلة ;)

    الله يسلمك و تعيشي و تعلي لعيلتك و دوما افتحي الموقع و انت جوعانة حتى يصير عندك حوافز للتجريب ;)

  15. آرام 26 September 2011

    عن جد روعة، خفيفة وظريفة وما في ألذ منها.
    استخدمت القلي لأن طريقة الشوي بالفرن ما عم تنجح معي، ولذلك يا إما شوي على الفحم أو الغاز أو قلي عادي.
    بالنسبة للكالوريات يمكن ينحسب حسابهن لما تكون مجرد سلطة مع وجبة تانية دسمة، بس لما تكون هي الوجبة بحد ذاتها فبتطلع كتير خفيفة ومهضومة. وبعدين ملعقتين كبار صنوبر فيهم حريرات تعادل زيت القلي :)

    يسلموا إيديك أخت منى … وشكر خاص على كل وصفة فيها بانجان 8)

تقييم الوصفة
عاديةقد أحضرهاجيدةممتازةأكثر من رائعة (No Ratings Yet)