عجة الشوكي


         وصفة : منى                 2013/06/05                 4 تعليقات
عجة الشوكي

في هل المدينة الي لابسة غلالة سوداء من الحرايق و النار و الهم الطابق على صدر الناس , لسه عم يصير أشياء حلوة , لسى ممكن تجتمع مع ناس بتحبهن و بيحبوك أو تضحك من جوى قلبك أو تقابل صديق بالصدفة أو تتعلم أشياء جديدة , لسى الناس عم تحب و تعشق و تتجوز و تتصاحب و تولد . من زمان كانت تدايقني الزحمة , هلا كل ما مشيت بالشارع و كان في زحمة عم حب أكتر , كل ما كان زحمة معناها لسى هل المدينة بينعاش فيها و فيها ناس مؤمنة فيها , مؤمنة بالارض الي ما بتتعوض و الحياة الي ما مكن تنبنى غير على هل التراب , جامعنا مع بعض شي كبير و كل واحد ماشي بالشارع عم حس انو في شي كتير كبير بيني و بينه , أكتر منه انو ابن بلدي و مدينتي , حاسسته أخي و من لحمي و دمي , في اشيا أد ما الانسان حكى عليها و بيفكر حالو انو بيعرفها , ما ممكن يدركها غير لما يمر هو بنفسه فيها , لهيك ما كنت بعرف أديه بحب حلب و أهل حلب إلا لما انجرحت حلب و طلع كل العاطل و المنيح الي بقلبها .


بجمعة ستاتية صغيرة من الجمعات الي لسى قدرانيين نعملها , منتلاقى فيها مع البقيان و الي لسى ما هج , وصل الحكي على الاكل كالعادة , و اجت سيرة عجة الشوكي , و الي كانت عم تحكي خالة خلود أزرق , رفيقة خالتي , حكت عن الوصفة الحلبية القديمة , و اديه طيبة و سهلة , قمت انا متل الحلويين لما رجعت على البيت كان عندي كم شوكية , بشرتهن و تبلتهن و جهزتهن على طريقتها , عن جد مو معقول شو طيبين و سهلين و لا تنقي البقدونس و لا تفرميه , و أول ما طلعوا من النار كانوا مقرمشين من برة , , ما بتحسي حالك عم تاكلي عجة , و الشعب عندي شي فكرها اقراص لحمة , شي فكرها عجة كماية , كتير كتير الوصفة طيبة و مستاهلة تجربيها .

تسلم دياتك خالة خلود :)


بالصحة و الهنا

شو لازمنا ؟
6 حبة كبيرة شوكي , مقشرة و مجهزة
12 بيضة
ملح و بهار
نصف ملعقة صغيرة فليفلة حمراء ناعمة
3 ملعقة كبيرة طحين
1 حبة كبيرة بصل , مفروم ناعماً
1 فص ثوم , مهروس
طريقة التحضير

• يخفق البيض مع البهارات و الملح و البصل و الثوم و الطحين في وعاء زجاجي و يوضع جانباً .
• تبشر حبات الشوكي و توضع مباشرة في مزيج البيض . تقلب حتى تتوزع في البيض .
• يقلى مزيج الشوكي على نار متوسطة بزيت لزيتون في قلاية العجة ( قلاية خاصة على شكل عيون ) , يقلى على دفعات حتى ينضج على الوجهيين .
• ترفع الأقراص على رق ماص , تقدم فوراً مع السلطة أو اللبن و الخبز العربي .

التعليقات

  1. ياسمين 22 May 2014

    وجعتيلي قلبي و الله الله يخفف و يفرج يا ست الكل

    اما العجة فمتل كل وصفاتك بتجنن

    • منى 26 June 2014

      سلامة قلبك , منورة :)

  2. هناء 22 May 2014

    روووووعة

تقييم الوصفة
عاديةقد أحضرهاجيدةممتازةأكثر من رائعة (4 votes, average: 5.00 out of 5)