فتة المكدوس


         وصفة : منى                 2010/02/03                 43 تعليقات
فتة المكدوس

هالفتة من الأكلات المفضلة عند الكل ودائما بتلاقيها موجودة على السفرة بالعزايم الشامية .

وانا من جهتي بعملها احياناً لعيلتي طبق رئيسي من كتر ما بيحبوها لأن اذا وجدت بيتركوا باقي الأكل وبيصير الهجوم مركز عليها

وهالاكلة بتصير بطريقتين طريقة الباذنجان المحفور والمحشي وطريقة الباذنجان المشروح بالنصف والحشوة على الوجه وانا شخصياً بعتمد الطريقة التانية لأن بلاقيها الذ فأنا من عشاق الباذنجان وما بحب يروح منه أي شي

بتمنى الكل يجرب هالوصفة لأنها بالفعل بتستحق التجريب وهي سهلة كتير

بعملها صيف وشتاء لأني دايماً بحتفظ بالباذنجان بالفريزر اثناء الصيف بحضره بكل انواعه مع انه ما عاد انقطع من الأسواق بالشتاء بس خضرة الصيف غير شكل






كيلو باذنجان
لحمة مفرومة300 غرام
بصلة صغيرة
ملح بهار ملعقة كبيرة زيت زيتون
خبز عربي مقطع ومقلي

صلصة البندورة:

كوبين مرق لحم
عصير تمر هندي
ملعقتين رب بندورة
رشة ملح وبهار

صلصة اللبن:

كوب ونصف لبن
نصف ملعقة صغيرة ثوم ناعم
ملعقة كبيرة طحينة
(تعدل الكمية حسب حجم طبق الفتة يعني لازم الصلصة تغطي الطبق كله)

لوز وصنوبر مقلي
رشة بقدونس للوجه





• يقشر الباذنجان مقلم يشرح مناصفة اذا حجمه عادي او يقطع شرحات دائرية بسماكة 1سم اذا كان الباذنجان كبير يقلى بالزيت ويرفع على مصفاية للتخلص من الزيت الزائد

• نفرم البصلة ناعمة وترفع مع اللحمة على النار مع اضافة ملعقة زيت الزيتون تقلب جيدا ويضاف الملح والبهار(السبع بهارات) تخفض الحرارة وتغطى وتترك لينشف ماءها وقتها بتكون جاهزة

• (( هي طريقتي لقلي اللحمة الناعمة بكل طبخاتي بتضيف فرق كبير بالطعم في كتير ناس بتقول ما بدها هالأكلة بصلة بس انا اكتشفت ان اللحمة دايماً وابداً بتقبل البصلة معها بكل الطبخ وملعقة زيت الزيتون كمان بتضيف طعم غير شكل انتوا جربوها وعطوني رأيكم))

• تحضر صلصة البندورة نغلي مرق اللحم (اذا لم يتوفر ممكن استعمال مكعب ماجي اللحم) يضاف له التمر هندي ورب البندورة والملح ورشة بهار صغيرة وتعدل حسب الذوق بس لازم تكون حامضة

• نضع داخل الصلصة قطع الباذنجان المقلي نغليه مدة 5 دقائق فقط لأنه اصلا بيكون شبه مستوي وما بدنا ياه يفرط خلال التقديم

• نحضر صلصة اللبن باضافة الملح والثوم والطحينة لللبن

طريقة التقديم:

نضع بطبق البايركس الكبير او بصينية الفتة المفضلة عندكم الخبز المقلي طبقة كاملة نسقي الخبز بصلصة البندورة فقط كمية تغطي القاع حتى ما يطرى الخبز نغطي الخبز بصلصة اللبن كمان طبقة معتدلة حتى نحافظ على قرمشة الخبز نصف الباذنجان على وجه اللبن بشكل مرتب وتنثر اللحمة المقلية بالتساوي على الوجه ثم اللوز المقلي والصنوبر طبعا حسب الرغبة ورشة البقدونس للتزين وطعمتها كمان اضافة لذيذة وألف صحة وهنا

فكرة ثانية للتقديم:

يحفر الباذنجان ويحشى باللحمة المقلية ثم يقلى بالزيت ويضاف لصلصة البندورة ويصف على وجه الفتة

اقتراحات:

1- مؤخرا ما عدت قليت الباذنجان وانما صرت اشرحه واضعه بصينية الفرن وارشه بقليل من زيت الزيتون او أي زيت نباتي ورشة ملح وفلفل أسود واشويه بالفرن على نار قوية مدة 10 دقائق ما بتصدقوا طعمه اللذيذ وصرت تقريبا بكل الطبخات المحتاجة قلي مثل المقلوبة والمنزلة وهالفتة اعتمد طريقة الشوي وما اختلفت طعمة الطبخة بيكفي انها صحية وما بتأنب الضمير

2- بالنسبة للخبز المقلي انا عادة بقلي كمية خبز وبيبس الباقي وبحط طبقة خبز يابس وطبقة خبز مقلي فوقه وهالطرقة تفي بالغرض( الطعمة)

التعليقات

  1. منى 3 February 2010

    كتير طيبة هل الاكلة و الها شعبية و بتعرفي طريقتك مو بس بتشهي , كان واضحة كتير و تفاصيلها كتير مهمة

    انا بستعمل البانجان الصغير للوصفة و بعد القلي بحشيه متل حشوتك من دون البصل و بزيادة فليفلة خضراء , بحب طعمتها كتير و اخر الشي استعمل البندورة الفريش , لان انا ما بحضر هل الوصفة الا في الصيف و احط مع الصلصة بصل

    سلم هل الديات فروحة , مممم باين عليك نفسك بياخد العقل و عجبتني كتير طريقتك بالحشو , رح جربها المرة التانية اذا ربنا راد و اكيد ببقى بنزل صورة لتطبيقي :zzz

    سؤال , كيف بتحفظي البانجان لهل الوصفة بالفريزر ؟

    بانتظار وصفات تانية منك

  2. Mays 3 February 2010

    يسلم إيديكي يا فرح ، و أنا هالأكلة إلها معزة خاصة عندي لإنو كانت تعملها بنت حماي الله يرحمها و توفت قبل ما آخذ الوصفة منها.
    إن شاء الله ع التجريب قريبا.

  3. منى 3 February 2010

    :sigh

  4. Mays 3 February 2010

    سلامتك منى الزعل ، شو بنا نساوي ، هيك الله أراد

    إن شاء الله دايما تضلي هيك :)

    و ما شوفك أبدا هيك :sigh

  5. gsm 3 February 2010

    :eek :eek مو معقول فتة مكدوس صرلي زمان عم استنى هل الوصفة انا كتيير سمعانة فيها ومؤخرا دقتها بمطعم شامي عندنا هون وكتيير حبيتا وصار فيني بس بدي اعرق طريقة تحضيرها خلص على التجريب فورا وببقى بخبركم عن النتائج بس عن جد يسلمو ايديك يا فرح الطريقة كتيير واضحة :zzz

  6. منى 3 February 2010

    ميوسة امين , و ان شاء الله انت كمان و كل حبابك

    gsm :) قديه في اخوات متلك كمان عم يستنوا الوصفة و هي الطريقة ما شاء الله شو بتشهي , ان شاء الله تجربيها و تكون متل ما بتحبي و اكتر ;)

  7. غيث 3 February 2010

    الله يسلم ايديك فروحة والله انا من زمان مستنية اعرف كيف بتصير هالاكلة وسمعت عنها انها طيبة من ناس داقوها بس ما بيعرفو يعملوها المهم شكرا لك لانني انتظرها واكيد على التجريب لاني بحب الباذنجان ومكوناتها مرغوبة بالعيلة عندي شكرا فرح ما بعرف اذا قرأتي تعليقي على كاتو الموز بالميكروويف عملتو ونجح وشكرتك عليه شكرا جزيلا والله يجزيك الخير انت ومنى مرة تانية

  8. منى 3 February 2010

    الف هنا و عافية غيوثة على البك على الكيك و كل شي جربتتيه او ناوية تجربيه ;)

  9. ميساء 3 February 2010

    يسلم دياتك أخت فرح أنا بعملها بالطريقتين حسب شو متوفر عندي نوع باذنجان و جربي كمان تحمضيها بدبس الرمان بتطلع كمان روعة ألف شكر مرة تانية لكل الوصفات اللي عم تقدميها :zzz

  10. farah 3 February 2010

    الحمد لله ان الوصفة نالت اعجابكم والله حسيت حالي كترت حكي فيها بس منيح في ناس متلي بتحب التفاصيل :)
    تسلمي لألبي يا منى والله اطرائك شجعني انزل وصفات كتير ظريفة عندي بس اللي مأخرني ان ما عندي كمرة انزلك صور لذلك يا ريت تتكرمي وتطبقي وتصوري بكون جدا ممنونة :zzz :zzz بتعرفي عين بتاكل قبل..
    وبالنسبة للباذنجان كنت زمان اقليه واحتفظ فيه بأكياس مفرغة الهواء بالفريزر بس مؤخرا اكتشفت فكرة الشوي والله فكرة بتجنن وعم تطلع الأكلات ولا أطيب حتى المقلوبة ما عدت قليتلها البانجان
    بيكفي تشويه بالطريقة اللي ذكرتها وطبقي الطبخة متل العادة وممكن تضيفي رشة بهار اكسترا لتعويض طعم القلي للي بيحب فبموسم الباذنجان بعمل رف كامل له بالفريزر وكله مشوي للفتة وللمقلوبة وللمنسفة وللمنزلة حتى بنتي وقت بكون مطلعته من الفرن ما بتستنى وبتكون عملتلها سندويشتين تلاتة منه وبتقول ماما متل المقلي واطيب ;)
    كأني استرسلت زيادة بالكلام بس والله بحس احيانا هيك مشتاقة نكون بشي جلسة سوا مع كل هالاخوات الظراف ونتبادل حوار بث مباشر :grin شو رأيكم صبايا؟؟

  11. farah 3 February 2010

    الله يسلمك يا ميس انشاء الله بتجربيها وبتطلع على زوئك

    gsm والله حبيبتي حابة اعرف اسمك ما عم يلفظ معي :p
    انشاء الله بتجربي الوصفة وبتطلع اطيب من المطعم والف صحة سلف ابقي خبرينا النتائج مع اسمك :p

    تسلملي عينك يا غيث انشاء الله تجربيها وتنال الرضى
    وريتو ألف صحة وهنا عالكيك حالا رحت للصفحة وشفت تعليقك الظريف ودعوتك ربي يكرمك يا رب ويفرحك باولادك

  12. laraye 3 February 2010

    ايه و الله يا منى وانا كمان كنت عم استناها

    يسلم ايديكي يا فرح ورح جربا فريبا انشالله

    بيني وبينك انا كمان هيك بشوي البانجان بالفرن باغلب الوصفات. اطيب واحسن للصحة
    ;) ;)
    بس عندي سؤال ممكن استخدم دبس الرمان بدال التمر الهندي ؟

    شكرا

  13. نور الأسلام 4 February 2010

    السلام عليكم كيفكم جميعا يسلمو اديك كتير على هالطبق انا كمان من زمان حابه جربها وكنت طلبت طريقتعا من منى من فتره وقالتلي رح تنزلها عالصيفيه لكن فينا نستغني عن التمر الهندي :?

  14. snow whit 4 February 2010

    أول مرة أسمع بفتة المكدوس ..

    بس أكيد راح أجربها لأني من عشاق الباذنجان ..

    وتسلم إيدك فروحة على الوصفة ..

    :)

  15. ام نور 4 February 2010

    سلم دياتك فروحة على هالفتة كتير سمعت عنا وهلىء سجلتا عندي انشالله رح جربا الله يجزيك كل خير بس ممكن نستبدل التمر الهندي بشي تاني لان غير متوفر عندي

  16. Iman 4 February 2010

    يسلموا ايديكي يا فرح على هالاكله الطيبه. فعلا فته المكدوس الها بهجه على السفره و بتلفت الانظار. وصفه لذيذه و يعطيكي العافيه.

  17. شيرين 5 February 2010

    تسلم ايديك يا فرح .عن جد من زمان عم استنى هالوصفة اللي بحبها كتير و كنت آكلها عن أصدقائنا الشوام بالسعودية .هلق صار فيني أعملها .طريقتك كتير حلوة و سهلة و صحية كمان.حبيت استعمالك للتمر هندي بالوصفة لأتي بحب الحامض.شكرا إلك. بانتظار المزيد من الفتات اللي بموت فيها.(على قولة منى)نحن شعب بنحب نفت و نلت.سلامي للجميع :zzz

  18. farah 5 February 2010

    الله يسلمك يا ميساء اي والله مرة جربتها بدبس الرمان وطلعت روعة والشكر لله انا بس عم شارك بمعلومات بسيطة من بحر غاليتنا منى

    حبيبتي لارا اكيد فيكي تستعملي اي حمض تاني متل الليمون ودبس الرمان وحتى الحصرم بيمشي حاله المهم تكون الصلصة حمضها كافي انشاء الله بتجربيها وبتطلع على زوئك والف صحة عالباذنجان المشوي مو فكرة بتجنن :zzz :zzz

    نور الاسلام يا الله شو حلو اسمك ربي يجعلك وذريتك منورين دايما بدين الاسلام حبيبتي اي حمض بيمشي حاله انت وذوقك

    سنو وايت اكيد ما بتندمي جربيها وخبرينا النتائج ما دامك من عشاق الباتنجان معناها صرنا صحاب ;)

    الله يسلمك يا ام نور اي حبيبتي بدلي الحمض بالنوع المتوفر عندك بذكر وقت كنت بالغربة والليمون كتييير غالي احيانا حتى استعمل ملح الليمون وبيمشي الحال انشاء الله بتطلع ظريفة ومتل ما بدك

    تسلمي يا ايمان وربي يكرمك يا رب

    انشاء الله الف صحة وهنا عالفتة والتمر هندي كمان انا متلك بحب حمضه بالذات لما بنحطه للمحاشي يمي ما الذه حمضتيلي ريقي على شي كاسة تمر هندي بس هلأ اللي ما بيعرفوه بيفكرو ان بنشربه سادة هو بينضاف له سكر وبيصير مشروب كتير لذيذ بالصيف وبالذات برمضان بتخيل اختي منى اكيد منزلة وصفته بقسم المشروبات اكيد يا نسرين بتشربيه متلي صح؟؟ :zzz

  19. marim 6 February 2010

    شلونك اختي منى بس بدي اسالك سؤال هلاء كل وصفة بالموقع يلي مو باسمك انتي جربتيها يعني اكيد بتظبط لاني مومسترجية جرب غير وصفاتك وشو رايك بحلويات منال العالم مجربة شي من عندها

  20. منى 6 February 2010

    هلا مريم :)
    لا مو كل الوصفات الي منزلينها الاخوات بالموقع مجربتها, الي مجربته كاتبة اني جربته بالردود و كتير احيان بحط صورة لتطبيقي :zzz

    منال العالم ما في تنين بيحكوا فيها , انا بزمناتي جربت الها كم وصفة , بس ما طلعوا متل ما بدي :roll

  21. marim 7 February 2010

    اختي منى شكرا كتيرالك بستنى ردك وانا كتير فرحانة بدي اطلب منك طريقة سينابون القرفة بس ماتكون طعمتها عجين من جوى الله يوفقك عم عزبك معي الله يخليلي ياكي ويجزيكي الخير :grin

  22. منى 8 February 2010

    ايه تكرم عيونك , انا اصلا رح نزل وصفة السينامون :zzz

  23. laraye 18 February 2010

    فروحة امبارح جربتا
    وكنت خايفة ما تزبط معي او جوزي ما يحبا بس بالعكس كتير طلعت طيبة و خفيفة لان شويت البانجان وحمصت الخبز بالفرن متل ما بتعمل منى :)
    بس عندي سؤال يا ترى فتة الدجاج بنفس الطريقة بس منبدل البانجان بالدجاج الا شو كمان بيختلف؟
    شكرا سلفا

  24. farah 15 March 2010

    أهلين حبيبتي لارا آسفة للتأخر بالرد بس كان عندي ظروف ومن أكتر من فترة طويلة ما دخلت الموقع بالنسبة لفتة الدجاج حبيبتي بتختلف عن هي وبظن الأخت منى منزلتها رح اتحقق لك من القائمة واذا مو موجودة ببعتها للغالية وهي بمعرفتها بتنزلها وانشاء الله ألف صحة وهنا على البك والب كل من أكل من فتة المكدوس كتير فرحت انها عجبتك ونجحت معك

  25. زين الشرف 7 October 2010

    والله يا منى بدي اجربها بالتمر الهندي
    انا بالعادة بحط دبس رمان
    ع العموم يسلم دياتك وكل شي جربناه كتير طيب

  26. منى 7 October 2010

    هلا فيك زين :)
    هلا انا جربتها بنوعيين الحمض و طلعوا التنين كتير طيبات , انا كنت ما حمض الصوص , بس طلع هل الاضافة الصغيرة بتعمل كل الفرق :)

    نورتي الموقع , مية هلا فيك

  27. منى 7 October 2010

    سلام عليكم فرح :)
    جربتها من يومين و كانت اكثر من رائعة , هلا انا بحضرها بطريقة كتير قريبة الك , الفرق اني بشق البانجان و بحشيه بحشوة من اللحمة و الصنوبر و المرق ما كنت بحمضه بشي .

    الي غيرته على طريقتك و حبيته كتير هو التمر هندي بالصوص و البقدونس و اللحمة على الوج بالاضافة للحمة بقلب البانجان , يمم يمم يممم كبيرة :zzz

    سلم هل الديات و انا بانتظار وصفات اصيلة منك :)

  28. غيث 8 October 2010

    الله يجزي الخير كل مين عم يعطي نصيحة بكل اكلة بتنزل بالموقع انا بشكرك فروحة انت ومنى طبعا لاني جربت هالاكلة ونالت الرضا الله يسلم ايديك يا رب :)

  29. farah 8 October 2010

    انشاء الله ألف صحة وهنا مابتصدقي شو فرحت لما عرفت انك جربتيها وعجبتك وأعدت اضافتها للقائمة الرئيسية حسيت انك هديتيني أحلى هدية بميلادي اليوم هالصورة اللي حاطتيها بتجنن شهيتيني اطبخها بكرة :zzz

  30. منى 9 October 2010

    كل سنة و انت سالمة فرح و ان شاء الله كل ايامك خير و سعادة و انا الي حابة كتير اشكرك مرة تانية و تالتة على الطريقة المفصلة و الواضحة للوصفة , يسلمن :zzz

  31. om nabeel 9 October 2010

    تسلم ايدكي رح اجربها قريبا

  32. غيث 9 October 2010

    نسيت اقول لك فروحة اني جربتها بحمض الليمون والباذنجان كان مقلي مو مشوي وكتير احببناها الله يجزيك الخير يا رب ;)

  33. farah 11 October 2010

    الله يسلمك يا أحلى منى والشكر حبيبتي الك انك عملتيلنا هالموقع المميز اللي بيحسسني بدفئ العيلة

    غيوثة ألف صحة وهنا على ألب الكل ومتل ما قلتلك أي حمض متوفر بيوفي بالغرض وكل شخص بالنهاية وذوقه كتيير انبسطت انك جربتيها ونالت الرضا :zzz

  34. Lost spoon 16 October 2010

    Salam all,
    My only problem with this dish is:MY GUESTS EAT IT ALL AND THERE IS NOTHING LEFT FOR ME!!!! :roll
    The only thing I do diffirent is the way I present it, my egglplants dont always look so happy so I put the bread and sauce, then the eggplants and finally the yougort sauce and top it with the parsly and nuts. The contrast of white and green is so pretty.
    Rola.

  35. farah 17 October 2010

    انشاء الله الف صحة وهنا يا رولاعلى البك والب ضيوفك ويا ستي مشكلتك حلها تكبري طبق التقديم شوي وعلى فكرة حتى لما تبات لتاني يوم بتكون كتير لذيذة
    وهي باردة
    وطريقة تقديمك صدقي كنت زمان هيك قدمها لحتى كنت عازمة ست كبيرة بالعمر ونقدتني قالتلي هيك اصولها :roll
    فأنا حبابة سمعت سمعت الكلمة وصرت ساويها بالطريقة الأصولية المذكورة بالوصفة :zzz
    وهي بكل الأحوال بتصير متل اللوحة الفنية اللي بتزينيها بزوءك وفنك ومشكورة لثقتك بوصفتي وتجربتها

  36. منى 18 October 2010

    صحتين و الف الف هنا رولا :) الحمد الله انها عجبت الكل و زبطت معك , يا ستي متل ما قالت فرح , حتى الي زاد لتاني يوم طلع خيلة و طيب , ما كنت متوقعة ان الخبز رح يصير هيك طعمته , بيجنن

  37. ام نور 13 November 2010

    السلام عليكم كيفك منى انشالله بخير حبيبتي حابة اسالك عن مربى الباتنجان كيف بينعمل لان بعتتلي نداء مرطبان صغير يا الله شو طيب غير شكل عجب اهلي وبيت حماي كتير ما خطرلي بهل لذة نحن ما منعملوا بس لما دقناه كتير عجبنا وقلتلون رح جبلكون الطريقة شكرا الك حبيبتي

  38. منى 14 November 2010

    ببعتلك الطريقة بعد العيد ان شاء الله على الايميل , لان مو حابة نزل الوصفة هون من دون صور :zzz

  39. gsm 23 December 2010

    السلام عليكم كيفك فروحة واخيرا عملت فتة المكدوس على طريقتك شو طلعت يميييييييييي بس بصراحة انا بس ضفت شغلة وحدة ققلبت فليفل خضرة مع الباتنجان طلعت يميييييي وبالنسب لإسمي هادا الأسم يللي إخترته عبارة عن اول حرف من إسمي الثلاثي يعني انا إسمي غفران سماقية :zzz
    فرصة سعيدة فرح

  40. farah 1 January 2011

    أهلين حبيبتي غفران عاشت الأسامي يا رب و انشاء الله صحة وهنا على ألبك انتي والعيلة كتير فرحت انك جربتيها وعجبتك وفكرة الفليفلة حلوة واكيد بتعطي مذاق جديد ولذيذ رح جربها المرة الجاية بالفليفلة
    ويا ستي انا اسعد بمعرفتك :)

  41. ندى الصباح2 25 July 2011

    الوصفة روعة اكيد راح اجربهابتستاهل تسلم الايادي .

  42. QueenNour1 9 October 2011

    يسلموا هالإيدين على هالوصفة الطيبة، أنا عندي سؤال و ياريت ما تتأخري على الرد علي، السؤال هو: بدل ما نقلي الباذنجان المحفور، فينا نشويه بالفرن؟ لأنه أنا بحب إنه يكون خفيف على المعدة. و شكراً سلفاً على الرد…

  43. منى 10 October 2011

    انا جربتها بالمشوي و طلعت طيبة , بعد ما جهزته دهنته بزيت الزيتون و على الفرن , خفيف متل ما قلتي و ما غب زيت و طعمته طيبة كتير ;)

تقييم الوصفة
عاديةقد أحضرهاجيدةممتازةأكثر من رائعة (2 votes, average: 5.00 out of 5)