قرنبيط بالطحينة


         وصفة : منى                 2007/03/22                 23 تعليقات
قرنبيط بالطحينة

هل الوصفة من أطيب وصفات القرنبيط عندي , القرنبيط بيشرب من الطحينة و بيدوب بالتم و مع رغيف خبز تازة , اطيب شغلة , و انا لما بيكون ادامي هيك صحن ما بعود ارفع ايدي الا لما يخلص , يمممم

من زمان كنا نعمل قرنبيط مقلي و نقدم معه طحينة , بس لما دقت هل الطبق أول مرة عند اهل زوجي من تحت ديات خالة نجاح اتحسرت على شبابي الضايع من دونها :) , فعلاً مميزة و شي ناهي .

بالصحة و الهنا



رأس قرنبيط متوسط الحجم

5 ملعقة كبيرة طحينة
عصير ليمونة حامضة
2 فص ثوم مدقوق
ملح
ملعقة صغيرة فليفلة حمراء ناعمة
نصف ملعقة صغيرة كمون
كوب ماء بارد
زيت ذرة لقلي القرنبيط
بقدونس للزينة






• يقطع القرنبيط إلى زهرات ثم يقلى بالزيت العميق على دفعات حتى تشقر ثم توضع الزهرات المقلية على ورق ماص ثم يرتب في صينية فرن .



• تمزج الطحينة مع عصير الليمون و الثوم و الملح و الفليفلة الحمراء و الكمون و يقلب الكل جيداً ثم يضاف الماء بالتدريج مع التقليب بعد كل اضافة حتى تتجانس الصلصة .

• توزع صلصة الطحينة فوق القرنبيط ثم تخبز الصينية في الفرن لمدة 15 – 20 دقيقة .

• يرش البقدونس على وجه القرنبيط بالطحينة و يقدم فاتراً أو بارداً مع الخبز العربي .

التعليقات

  1. WAFAA 30 March 2008

    ياعينى على الزهرة بالطحينة شو طيبة
    الله يعطيكي العافية
    بيضتى وجهي مبارح على الغذا
    وطلعت الاكلة زاكية كثير وبتشهي
    شكرا كثيييييييييير

  2. منى 30 March 2008

    صحتين و هنا و عوافي يا وفا:)
    انا هل الاكلة بموووت عليها و فيني خلص صينية كاملة منها :grin و الله عن جد باكل منها و ما بعرف كيف وقف ;)
    كتير انبسطت انها عجبتك و عجبت العيلة

  3. سارونات 12 December 2008

    السلام عليكم و رحمة الله و بركاته
    مبينتهاكتير حلوة هالوصفة و ان شاء الله راح جربها قريبا
    بالتوفيق
    سلام

  4. منى 13 December 2008

    ان شاء الله تجربيها و تحبيها لان انا بمووت عليها :zzz

  5. muna.g.7 13 December 2008

    اختي منى انا كمان بموت بالقرنبيط المقلي مع الطحينه ويكون مرشوش دبس رمان وجوز مفروم وبقدونس لكن اللي عندي في البيت ما يحبونه عشان كذه انا اكتفي اني احلم باكله

  6. منى 13 December 2008

    :grin يا حرام , يلا و لا يهمك , كل ما حضر من القرنبيط ابعتلك شوي على الايميل :zzz

  7. سارونات 28 January 2009

    السلام عليكم و رحمة الله و بركاته
    اختي منى ساويتها اليوم لهالوصفة و ريحتها طلعت حلوة بس الطعمة ما كتير طيبة ما عرفت اذا هيك هي طعمتها او الوصفة ما ضبطت معي
    الصوص طلع لونو برتقالي هيك بيطلع لونو او لا
    و يمكن لاني عملت الطحينة بزيت زيتون
    هي طلعت طعمتها مقبولة بس مو متل ما توقعتها :? و الله ما عرفت اذا المسالة مسألة ذوق او ما نجحت الوصفة معي يعني مشان عيدها او لا خصوصا انك قلتي انك بتحبيها كتير و نحنا ذوقتااحيانا كتيرة قريب لبعض :? شو قولك اختي منى
    بالتوفيق
    سلام

  8. منى 29 January 2009

    اتوقع اختي انها ما زبطت معك , لان هل الوصفة تقريبا الكل بيحبها كتير و انا بموووت عليها .

    شوفي اختي قبل ما تضيفي الطحينة دوقيها لحتى يكون حمضها على زووءك و بهاراتها , بس غريبة هي قصة ان طلعت برتقالية ! أتاوقع في شي مو مزبوط لحتى هيط طلع لونها :roll

  9. اباء 22 November 2009

    السلام عليكم
    جرّبت هالأكلة اليوم وفعلا كتير طيبة
    عادة بطبخها من غير كمون وبصل
    بس سؤالي عن الفليفلة الحمرء الناعمة طالزجة أو بودة وحلوة أو حرّة؟؟ :zzz

  10. منى 23 November 2009

    هلا اباء :)
    رفتي الموقع اختي , مية السلامة فيك و الف صحة و هنا يا رب .

    أختي الفليلفة ناعمة بودرة و فيكي تستعملي حلوة او حرة حسب الراي العم العالمي عندك :)

  11. na3oom 4 January 2010

    يعني والله احترت وصفتين للقرنبيط بالطحينة وحدة بلحمة ووحدة بدون طيب شو أعمل أنا
    عجب مين أطيب

  12. منى 4 January 2010

    التنتين طيبات كتير , حسب شو مشتهية , اكلة خفيفة من دون لحمة , اذا اكلة غدا معتبرة على اللحمة ;)

  13. na3oom 2 February 2010

    يسلمو ايديك على فكرة صار عملتها مرتين
    بما انو بالحمل ماعم اشتهي على اللحمة كتير فهي أكيد الحل المشكلة انو راس زهرة واحد ماعم بكفي والله عم اخلص بسرعة

  14. منى 2 February 2010

    ان شاء الله الف صحة و هنا يا حق و الله يقومك بالسلامة و تكوني انت و البي بي بصحة .

    مممم , بموت على هل الاكلة و منظر الصورة بيشهي , كانت كتير طيبة و الله , تسلم ايدي :grin

  15. شفاء 15 September 2011

    كتييييييييييير طيبة
    نالت الاعجاب وكررتها خلال اسبوع مرتين
    مرة بلحمة ومرة بدون
    يسلمو ايديكي الاهي

  16. منى 15 September 2011

    صحتين و الف عافية , ان شاء الله تكوني حسبتي حسابي بشي كم لقمة ;)

  17. foza 15 March 2014

    من وقت ما جربت هالوصفة صرت اشتري قرنبيط مخصوص مشان ساويها..كتير طيبة و لذيذة..يسلم ايديكي
    جربتها مقلية طلعت يمي..و لاني عم دور على اكلات صحية قلت خليني جرب بالقرنبيط المشوي : حطيت القرنبيط بالساندويتش ميكر و لما قرب يستوي حطيتوا على الشواية و كملت باقي الخطوات ..و كمان ضفت كوسا مشوية معه…كتير طيب

    يعطيكي العافية :*

    • منى 15 March 2014

      الله يسلمك فوزة , متلك انا صرت بجيب القرنبيط مشانها

      كتير حبيت فكرة الشوي , شكراً للاضافات يا جميل :)

  18. foza 15 March 2014

    العفو حبيبتي..انا الي بشكرك على وصفاتك الرائعة و الدقيقة …الله يجزيكي كل الخير
    و كل ما بجرب شغلة و يعجب بها ابو يارا..و الله ما بخبي عليه و بقلو هي من وصفات منى ..بقلي يسلم ايديكي و ايديها مدام منى..فنانات :)

    • منى 16 March 2014

      خبيييي ما تقولي , خبي خبي و ما عليك :D

      الله يسلمك فوزة , عوافي ان شا الله و الف هنا

  19. omomara 28 May 2014

    كتيييييير طيبة
    يسلموا ايديك يارب
    وحسيتها أخف من القرنبيط المقلي لوحده
    لاقت قبول الشعب عندي
    شكرا كتير

    • منى 30 May 2014

      شكرا الك يا قمر و الف عافية و هنا و صحة ع قلوب الشعب واحد واحد و ملكتهن :)

  20. لميا 1 January 2016

    هالوصفة طيبة فعلا بس بدل ما تقلوه للقرنبيط حطوه بالفرن مع ملعقتين زيت وكمون وملح حتى يستوي حطوه بصينية وحطو فوقو مكعبات بطاطا مسلوقة و كمان حبة بصل تبلوها بالمقلاة وحطوها معو وصبو صوص الطحينة وحطوا الصينية بالفرن تطلع كثير طيبة

تقييم الوصفة
عاديةقد أحضرهاجيدةممتازةأكثر من رائعة (2 votes, average: 4.50 out of 5)