كريب بالشوكولا


         وصفة : منى                 2011/04/21                 32 تعليقات
كريب بالشوكولا

تقريبا أغلب الناس بتحب الكريب و مع ان وصفته بسيطة كتير بس مو كتير الي بيتشجع يحضرها . العجينة واحدة بس الحشوة ممكن تتغير و في مية الف فكرة و فكرة لتجددي فيها , حلو و مالح , بارد سخن , شو ما بيخطر على بالك اذا كان الكريب محضر صح فرح يطلع ايا شي فيه طيب


اليوم فكرة كتير بسيطة , حاشية الكريب بكريم موسلين , الي هو كريم باتيسير مع شانتيه , ما بتعرفي هل الاضافة البسيطة شو بتفرق بالطعم , بتحول الحشوة من شي طيب لشي يجنن و الحشوة هي لو مديتيها على بسكويت بتطلع يممي لو حشيتي فيها الكاتو بتطلع نممي و لو حشيتي فيها الكريب بتطلع نميي نميي .


بعدها وزعت عليه صوص شوكولا و اخر لمسة هي كرانش الشوكولا الي حيضيف قرمشة لكل لقمة , القوام مهم بكل وصفة و هي الاضافة رح تعمل اللمسة المزبوطة بين الحشوة الكريمة الناعمة الي بتدوب بالتم و القرشة الطيبة للكرانشات و كله مغطس بصوص شوكولا بياخد العقل .


بالصحة و الهنا





وصفة صوص الشوكولا
وصفة الكريب
كرانش شوكولا للتزيين


كريم موسلين :

2 كوب حليب
نصف كوب سكر
2 صفار بيض
فنجان صغير طحين
فانيليا
رشة ملح صغيرة
كوب كريم سائل خاص بالحلويات , يفضل ان تكون باردة





يوضع كوب و نصف من الحليب على النار و يترك حتى يغلي .

يوضع الطحين و السكر و الفانيليا و رشة الملح و باقي الحليب البارد في وعاء زجاجي و يقلب بمضرب سلك حتى يتجانس . يضاف صفار البيض و يقلب حتى يتجانس المزيج .

يضاف القليل من الحليب المغلي على مزيج الصفار مع التقليب المستمر , يضاف مزيج الصفار على باقي الحليب المغلي و يقلب الكل بسرعة و على نار متوسطة أثناء الإضافة كي لا يتكتل الكريم .

يغلى الكريم لمدة دقيقتين مع التقليب المتواصل حتى الحصول على كريما ناعمة . تبعد عن النار و تترك الكريما حتى تبرد مع التحريك كل 5 دقائق لمنع تشكل قشرة على الوجه .

تخفق الكريما السائلة حتى تنتفخ و تصبح خفيفة . تضاف بالتدريج للكريم و تقلب بلطف حتى يستوعب الكريم الاضافة , تضاف كمية اخرى و تكرر العملية حتى انتهاء كل كمية الكريم المخفوق . اصبح الكريم موسلين جاهزاً .

تحشى حبات الكريب بكريم موسلين و يرتب في طبق تقديم , يوزع صوص الشوكولا على الكريب و ينثر الكرانش و تقدم .



التعليقات

  1. ALEA 21 April 2011

    وووووولي على قلبي شلكها بياخد العقل :cry

    يســـــــلم هالأيدين ست منى :)

  2. DOUHA 21 April 2011

    دخيلك لقمة :zzz

  3. أمــ نــــدى 21 April 2011

    تسلم الايادي ست منى
    وصفه رائعه جدا وعن نفسي من عشاق الكريب
    الله يبارك بعملك ولا يحرمك الاجر

  4. أم نوران 21 April 2011

    ماشاء الله يا منى يسلمو الايادي شو هالفن و شو هالنمي نمي :grin
    الله يعطيكي العافية الا ما اجربا صارلي زماااان سمعانة بهالحشوة و ما عم يخطري اساويها بس شجعتينا و الله كالعادة :)
    الله يبارك فيكي و يحميكي و يحمي عيلتك و بلدك .

  5. haya 22 April 2011

    وااااااو اخت منى هذه بجد شكلها كثير رائع ومن خلال وصفك الها صرت حابة كثير اني اجربها انا دائما بعمل الكرب بالعسل او المربى ومرات بعمله بالجبنة المالحة بيطلع شي زاكي بس هذه فيها شوكولا فطالع شكلها بيجنن :zzz

  6. منى 22 April 2011

    هلا عليا :)
    الله يسلمك حبيبتي , مية هلا فيك :zzz

  7. foforose 23 April 2011

    الله يعطيكي العافيه ست منى انا كتير بحب الكريب وخصوصي مع الشوكولا رفيقتي بتضيف مع الشوكولا بوظه بعد ما بتلفه رول كتير بتعطي طعمه طيبه وبقلبه بتحشيه موز وشوكولا يمييي.
    بتعرفي انا دقت الكريب من وحده فرنسيه هنه بحبوه مع عصير الليمون والسكر اول ماقالتلي انو هيك بياكلوه استغربت بس وقت دقته كتير حبيته نكهة جديده لقيته.

  8. محبةالمصطفى ملك 25 April 2011

    أولا اي اش هالكريب الرااااااائع
    منظره تحفة على قول أخواننا المصريين..
    ثانيا منى أنا عندي استفسار ..عملت اليوم مايونيز و لأول مرة بس ما طلع طيب (طلعت طعمة الزيت غالبة على كل شي)مع أن ما نقصت شي من المكونات
    برأيك لأن حطيت زيت زيتون؟؟؟؟؟

  9. أمــ نــــدى 27 April 2011

    فينك ست منى , مو مبينه كعادتك
    ان شاء الله كل شي تمام والاوضاع عندكم بخير
    الله يحمي بلادكم وبلاد المسلمين اجمعين

  10. منى 27 April 2011

    يا ضحى الصينية كلها الك مو بس لقمة ;)

  11. فرفوشة 28 April 2011

    أول مرة بشتهي جرب وصفة كريب
    بصراحة
    الصورة بتاخد العقل ماشاء الله
    بس عندي استفسار شيف منى
    هلأ الكريب هو نفسه البان كيك والا كل واحد شكل؟؟

  12. أم نوران 28 April 2011

    مرحبا اختي فرفوشة راح اسمح لنفسي اني اجاوبك بدال الست منى لانيها ما عم تبين :sigh اللهم اجعله خيرا
    الكريب مو نفسه البان كيك وكل واحد مختلف عن التاني بس يعني ولاد عم,البان كيك اسمك من الكريب ومقاديرو مختلفة شوي ..ان شاء الله اكون افدتك اختي و ان شاء الله لما ترجع الحبيبة منى بتبقى بتشرحلك بالتفصيل بتعرفيها ما بتقصر :)

  13. منى 29 April 2011

    هلا ام ندى حبيبتي :)
    تسال عليك العافية و الخير دوما ان شاء الله
    الاوضاع عنا ماشي حالها , بس القلب ميت , الله يحمي بلادنا و اهلنا و لا يضرهم يا رب :cry

    ان شاء الله تجربيه و يكون على زووءك:)

  14. سوسن محمد 29 April 2011

    مراحب أخواتي شلونكم ان شاء الله خير يا ست منى ليش مو مبينة الله يكون معكم ويحميكم
    بس عندي استفسار هلق عرفت منكم وصفة الحشوة بس العجينة شو ؟؟؟؟؟ ممكن التوضيح
    قبلاتي للجميع

  15. بنت دير عطية 1 May 2011

    السلام عليكم اخت منى كيفك ؟
    هالاكلة كتير لذيذة وبتشهي تسلم ايديكي بس بدي عزبك معي من بعد اذنك ياريت تعطينا طريقة ووصفة الكاتو تبع كل سنة وانت اطيب يا لقمة طيبة لان منظرو اكثر من روعة 8)
    والله يعطيكي الف عافية ;)

  16. فرفوشة 3 May 2011

    الله يعطيك ألف عافية أختي أم نوران
    ويجزيك الخير ع إفادتك

    بس عن جد يامنى وين هالغيبة؟؟ :?
    إن شاء الله المانع خير

    بصراحة الموقع من دونك ما بيسوى شي :cry

  17. فرفوشة 3 May 2011

    وأنا بحب أجاوب سوسن محمد من بعد إذن الغالية منى..
    أختي سوسن وصفة الكريب بإمكانك تشوفيها بس تضغطي ع كلمة (الكريب) وهي ح تلاقيها باللون الأخضر مع المقادير وكمان صلصة الشوكولا.

  18. أم ريماس 3 May 2011

    السلام عليكم حبيباتي شكرآ أختي فرفوشة على التوضيح بس اكتشفت هالشي قبل ما تقليلي بقى ما تواخذوني جديدة عالموقع بس الله يجزيكي الخير على توضيحك واهتمامك
    وعلى فكرة غيرت اسمي من سوسن محمد لأم ريماس لمن يهتم :roll
    وعسى خير أختي منى اشتقنالك وينك بقى :)

  19. أم ريماس 5 May 2011

    السلام عليكم يسلمو ايديكي يا أحلى الستات عن جد وصفة واوو يميي أنا جربتها وعجبتهم للكل وما كنت مفكرة بحياتي ممكن تنجح معي هيك أكلة لولا شرحك المفصل الها وعن جد الله يجزيكي ألف خير :zzz
    وينك بقى اشتقنالك :cry
    بانتظارك يا ست الستات :)

  20. منى 9 May 2011

    هلا ام نوران :)
    و الله نمي نمي ان شاء الله تجربيها و تحبيها و تكون على زوءك يا رب , و رح استنى رايك فيها ;)
    شكرا لجوابك و لوجودك الايجابي بالموقع , يا هلا فيك حبيبتي

  21. منى 9 May 2011

    هلا هيا :)
    طيبة بالمربى بس بالشوكولا بحسها اطيب , و رح تعجب الكل و خصوصا الاطفال , الله يحفظهم و يبارك فيهن

    رح استنى رايك بعد التجربة

  22. منى 9 May 2011

    هلا foforose :)
    فكرة بتاخد العقل , هي اول مرة اسمع فيها , عجبتني , ان شاء الله باقرب فرصة بجربها

    يمكن قصدك كريب سوزيت ؟ كمان طيب كتير و طعمة البرتقال و الحمضيات رح تخليه وصفة مميزة

    شكرا لاغناء الوصفة بالافكار , مية هلا

  23. منى 9 May 2011

    هلا ملك :)
    ان شاء الله تجربي الوصفة و تطلع متل ما بتحبيها
    انا كمان جربت المايونيز بزيت الزيتون و ما حبيته ابدا , يمكن لان زيت زيتونا طعمته قوية فما بيلبق للمايونيز

  24. منى 9 May 2011

    هلا فرفوشة :)
    متل ما قالت ام نوران البان كيك اسمك و فيك تعتبريه القطايف على الطريقة الاجنبية :grin
    ان شاء الله تجربي الوصفة و تطلع على زووءك و شكرا حبيبتي للسؤال , الله يديم الود و الخير و المحبة

  25. منى 9 May 2011

    هلا ام ريماس :)
    صحتين و الف الف عافية يا رب , الحمد لله انها زبطت معك و عجبتك و انا بقلك ما كانت رح تزبط معك لو ما انتي حابة تحضريها :)
    مية هلا فيك و شكرا على السؤال و كمان مبروك تغير الاسم , و اسفة للتاخر بالرد
    منورة 8)

  26. منى 9 May 2011

    هلا خلود :)
    ان شاء الله تجربيها و تحبيها و وصفة الكاتو صارت على الصفحة الرئيسية , ان شاء الله تجربيها و تطلع نمي نمي
    منورة يا جميل

  27. محبةالمصطفى ملك 10 May 2011

    و اخيرا يا منى
    بعد ما فقدت الأمل بردك :roll
    الحمد لله عالسلامة
    و مشان المايونيز أنا رجعت جربته بس بزيت ذرة طلع طيب :zzz
    يعني أكيد مع زيت الزيتون ما بيمشي الحال

  28. منى 10 May 2011

    صحتين و الف عافية :) منيح الي رجعتي عدتيه , هنا ملك ;)

  29. محبةالمصطفى ملك 14 May 2011

    على قلبك يا منى :)

  30. violet 25 June 2011

    كيفك مشتاقتلكم كتير ومشتائتلك صرلي فترة مشغولة بالامتحانات بس هلأ رح تشوفوني كتير بالصيف
    والله كنت جاي عبالي أتعلم طريقة الكريب لأنه كتير بحبه
    وهلأ جاييني مناسبتين عيد زواجي وبعدا عيد ميلاد بنتي
    بس بما انك ذكرتي المالح عبدور على حلويات مالحة أو ماشابه لأنو مرت أخي مابتحب شي اسمه حلو فحابه أتعلم من شان عيد ميلاد بنتي
    ويعطيكي ألف عافية ويسلم دياتك

  31. عمر بركه 11 January 2014

    ما شاء الله روعة تسلم الايادي

    • منى 17 January 2014

      الله يسلمك اخي عمر , منورنا و الله

تقييم الوصفة
عاديةقد أحضرهاجيدةممتازةأكثر من رائعة (1 votes, average: 5.00 out of 5)