مكعبات طبقات التشيز كيك


         وصفة : منى                 2011/02/05                 48 تعليقات
مكعبات طبقات التشيز كيك

اليوم وصفتنا مميزة لسببين , اول سبب انها الوصفة رقم 800 في الموقع الحمد لله رب العالمين صار عنا كنز كامل من الوصفات المجربة و الشهية و الي عم تجربوها و تحبوها و عم تصير جزء من عيلتكم و لقمة طيبة كمان عم يصير جزء من عييلتكم الحلوة الصغيرة و هادا شي بيشرفني و بيسعدني . السبب التاني ان هل الوصفة الي طلعت من أطيب الحلويات الي حضرتها كان نتيجة تجربة و عدة غلطات جروا بعضهم و ما كنت متوقعة ان ييطلع شي منه .

المهم , يمكن كتيرين منكم شاف أو جرب وصفة مكعبات التشيز كيك الرخامية . مع ان الوصفة رائعة بس صار اكتر من واحدة خبروني انهم لما عم يضيفوا الشوكولا على مزيج التشيز عم يتعزبوا و ما عم تزبط معهم متل الصورة , فكرت بشي يخلي الوصفة اسهل . كمان حبيت يكون طبقة التشيز اكبر , فخطرت ببالي فكرة و لحقتها فكرة تانية و قررت جربهم .
زودت كريم فريش للوصفة مع كورن فلور هي لحتى تكتر الطبقة البيضا و الشغل لهون كان تمام . بعدها أخدت من المزيج كوب و خلطته مع الشوكولا المدوبة و لما جيت لاعمل زوابع ما زبط معي ابدا و حسيته انتزع . و قلت خلص غسلت ايدي منه و لكم لحظة خطر ببالي انو وقف و ما كمل
. كمل و الا ما كمل , يلا بكمل لشوف , كملت و خبزت القالب و عيني عليه طوال فترة خبزه , ما لاقي الي الشوكولا الي نزعتلي القالب بالاول اتجمعت على الوج و صارت طبقة لحالها . بعد ما قسمناه طلع منظره بياخد العقل و الطعمة و لا أطيب و صرت حضره كل ما كون حابة غنج الاولاد بشي لا يقوم .

يعني اذا بتحبي تشوفي سحر بعيونك , حضري هل الوصفة و قطعيها مكعبات و خليها على طاولة المطبخ , بتلاقي القطع عم تختفي واحدة ورا التانية , خليلي قلوبهم الصغيرة ربي عافية و قوة و فهم و ذكاء و سعد و سعادة بالدنيا و الأخرة , امين .

على قولة واحد من الدكاترة عنا في الجامعة : what is the moral of the story ?
الدرس ان دوما الواحد بيتعلم من أغلاطه , و التجربة الي ممكن تفكرها مو منيحة بتضيف الك كتير , و أخر شي اذا بديت بالشغلة كملها للاخر .

بالصحة و الهنا






طبقة البسكويت :

كوب ( 140 غ ) طحين
2 ملعقة كبيرة نشاء
ربع كوب سكر بودرة
اصبع ( 100 غ ) زبدة طرية

الحشوة :

12 حبة كيري
ثلث كوب نشاء
كوب كريم سائل , أو حليب في حال لم يتوفر الكريم
فانيليا
ملعقة كبيرة لبنة
3 بيضات
فانيليا
نصف كوب سكر


طبقة الشوكولا :

كوب ( 100 غ ) شوكولا سادة أو على حليب مكسرة لقطع





• تدهن صينية بايركس ( القياس المتوسط ) بالزبدة ثم تغلف بورق زبدة و يحمى الفرن على درجة حرارة 180 .

• يوضع الطحين و النشاء و السكر البودرة و الزبدة في وعاء و تفرك المقادير بلطف بأطراف الاإصابع حتى الحصول على عجينة متماسكة , بعد أن يتماسك العجين لا تعجن لوقت إضافي كي تبقى مقرمشة بعد الخبز .

• توزع العجينة في القالب المجهز بشكل متساوي . تخبز الصينية في الفرن لمدة 10 – 15 دقيقة ثم تترك جانباً حتى تبرد .

• تحضر الحشوة , توضع الكيري و الكريم و اللبنة و البيض و الفانيليا و السكر في خلاط العصير و يمزج الكل حتى الحصول على مزيج ناعم .

• يؤخذ مقدار كوب من المزيج و يصب الباقي على العجينة الباردة .

• تذوب الشوكولا على حمام مائي و تحرك حتى تذوب الشوكولا تماماً . تبعد الشوكولا عن الحمام المائي و تترك جانباً لبضع دقائق ثم يضاف مقدار الكوب بالتدريج و يقلب حتى يتجانس المزيج .

• تسكب الشوكولا بشكل عشوائي ثم تخبز لمدة نصف ساعة تقريباً على درجة حرارة 160 . ترفع من الفرن و تترك حتى تبرد .

• توضع الصينية في الثلاجة لمدة أربع ساعات على الأقل ثم تقسم إلى مربعات و تترك لتصبح بدرجة حرارة الغرفة و تقدم .

التعليقات

  1. lolli 15 February 2011

    لليليليشششششششششششش و اخيرا
    و هي كمشة بوسات لانك نزلتي الوصفة :p حطيت هالوجه لانو مافي وجه عم يبوس ههههههههه
    بس الي سؤالين من بعد اذنك
    بالنسبة للبنه :
    نحنا اللبن اللي عندنا كلو بقر و طعمه حلو و منشفه لصير لبنة و ما بتشبه اللبنة السوريه لانها خفيفة الحموضة .. بيمشي حالها وللا الافضل اني حط جبن فيلادلفيا اللي اسمها FROMAGE FRAIS
    طعمتها ع حموضة يا ترى شو رأيك :?

    السؤال التاني بخصوص طبقة البسكويت
    بينفع انو نبدل طبقة البسكويت بعجينة الباف باستري :? :? يمكن بلشت اعفس ههههه :grin

    و اخر الشي بخصوص الفرن في المرة التانية كمان على حرارة 180؟

    و الله يخليلنا ياكي و لا يحرمنا وصفاتك و تجاربك 8)

  2. أم نوران 15 February 2011

    يس يس و اخيرا راح اكون اول وحدة بتجاوب هههههه
    لك شو بدي اقول ما خليتي شي ينقال الله يوفقك و يوفق ولادك و حبيب البك لكل خير و يسهل عليكي كل صعب و يستجيب دعواتك يا رب ..
    والله يا اختي منى انك ست عظيمة و ما بتحرمي الناس من الخير اللي الله عطاكي ياه,الله يكتر من امثالك :)
    ان شاء الله راح اجربو اول ما جيب طحين لانو كلو راح على المناقيش و كاتو التفاح من وصفاتك الرائعة اللي ببيضو الوش ..الله يبيض و جك يوم تسود الوجوه قولي امين .. :)

  3. juman 15 February 2011

    يسلمو ايديكي يارب ولن شالله جاري التنفيذ :) باينتا طيبة واكابرية وبتبيض الوجه… بس لنا هون ما عندي جبنة كيري او بصعوبة لحصلا فشو ممكن تنصحيني استخدم نوع تاني… يعني تكون قواما كيف وملوحتا؟؟؟ لانو خايفة جرب بالموزاريلا وتطلع مالحة :sigh

  4. rmroom 17 February 2011

    يسلمو ايدكي منى عم جرب وصفاتك كلون عم يطلعو طيبين كتير كنت بدي أسألك أنا عندي النشاء الحب مو الكورن فلور أديش بدي حط منها

  5. أم نوران 17 February 2011

    اووووووبس
    ههه حسبت حالي اول وحدة بترد يالله معلشي :sigh
    حبيبتي كان بدي اسالك لو مافي ازعاج فيني استبدل عجينة بالسكويت ببسكويت سادة معجون بالزبدة ولا ما خرج؟؟؟
    وشكرا مسبقا :)

  6. لارا مينا 18 February 2011

    ألف مبروك الوصفة 800

    وعقبال الوصفة رقم 1000
    وأكيد رح يكون الإحتفال فيها مميز أكثر, وإن شاء الله يصادف وجودها تاريخ 5/5/2013 :?

    آخر سطرين من مقدمتك جدا رائعة , ذكرتيني بأديسون , لما كانوا حاطين قبل فترة عنه بشعار جوجل الرسمي .

    وعادة لمايحطوا جوجل أي مناسبة لازم أضغط على شعارهم وأقرأ عنها .

    وأكثر مالفتني مقولات أديسون عن نفسه وحياته, إنسان يستحق الإعجاب.

    ومن مقولاته إلي أبهرتني وعلقتهاعلى الجدار , علشان أخواني وأخواتي الصغار دايما يقرؤوها ويتحمسوا اكثر:

    1) كثير من اخفاقات الحياة هي لأناس لم يدركوا كم كانوا قريبين من بلوغ النجاح .

    2)ليس معنى أن شيئا مالم يعمل كما تريد منه, أنه بلا فائدة.

    3)حاولت 999 مرة لصناعة المصباح الكهربائي ولم أسميهامحاولات فاشلة بل سميتهاتجارب لم تنجح..

    والكلام ممكن ينطبق على كل شيء في الحياة من طبخ وتعليم وعمل وغيره…

    أما وصفتك هذه , أنا أكثر وحدة من الأعضاء لازم لازم لازم أعملها.

    لأن فيه فكرة براسي ممكن تسهلها أكثر على بعض الأخوات , في حال نجحت خبرتك ورح تنزل بموضوع بشكل مستقل , وإذا مانجحت اعتبري ماكأني كتبت شيء .

    Good Night
    :zzz :zzz

  7. shimOoO 19 February 2011

    السلام عليكم ورحمة الله وبركاته
    كيفكو ياجماعة كتييير مشتقالكو… بس توجيهي ماخدني عن النت كلو تقريبا حبيت اهني خالتو منى صابوني بهالانجاز منو لاعلى انشاءالله كتيييييييير كنت بستنى طريقة للتشيز كيك يسلمو كتيير انشاءالله بجربها وبتعجب الاهل والاحباب يارب:)

  8. ام جنى عبيدات 20 February 2011

    الف مبروك الوصفه رقم 800 عقبال الوصفه رقم 8000 يارب.. انا بحب احكيليك يعطيكي العافيه والصحه وبهنيكي لانك امراه وام وطالبه وطباخه من الدرجه الاولى فيهم كلهم :) انا مع بنتين ومو ملاقيه وقت لشي.. بتمنالك من كل قلبي الطموح اللامنتهي والاحلام المتحققه باذن الله

  9. منى 22 February 2011

    هلا لولو :)
    و الله معك حق لازمنا وج عم يبوس ضروري , بركي بحكي مع محمد يظبطلنا ياها :grin

    بالنسبة للبنة استخدمي اللبنة المتوفرة عندك و قلبيها مع ملعقة صغيرة عصير ليمون لان بدنا حموضة كتير خفيفة للوصفة

    باف باستري , هلا ما اتوقع رح تزبط يمكن لان الباف باستري رح تشتش و تتشرب الطبقة البيضا , بس فيك تستعملي بسكويت و زبدة ;)

    اخر الشي المرة التانية رح نخفف الحرارة شوي , شكرا لتنبيه و هلا رايحة عدل الوصفة

  10. ام نور 22 February 2011

    سلام عليكم كيفكون يا صبايا وكيفك يا منى انشالله بخير وصفة رائعة جدا سلم دياتك وناوية جربها السبت انشالله بمناسبة عيد ميلاد بنتي كتير سهلة ومكوناتها بسيطة حابة تعطوني رايكون شو ممكن اعمل بيوفيه خرج عيد ميلاد بنتي عازمة اطفال وامهاتهم الصراحة اول مرة بفكر اعمل عيد ميلاد وقلت فرصة بما انو عطلة مدرسية جمعتان اعمل جمعة نسوان مع ولادون ميشان الولاد يفرحوا وتغير شكل فشو بتنصحوني

  11. منى 23 February 2011

    بنصحك تعملي نواشف و اشيا بتتاخد بالقطع , متل ميني بيتزا و فطاير مشكلة , ناغيت دجاج , كب كيك , سندويش صغير دجاج مع مايونيز , ميني برغر هيك اشياسهلة لحتى ياكلوها الاولاد و اذا تركوا شي بيصير الهدر ااقل ;)

    كل سنة و الاميرة الصغيرة بالف خير و عقبال ما تشوفيها متل ما بتحبي

  12. منى 23 February 2011

    هلا ام نوران :)
    الله يجبر بخاطرك و يسر قلبك على هل الدعوات الي بتبل القلب , يا ستي مو فرق الاول و الا التاني المهم انه وجودكم بيعنيلي كتير :zzz

    صحتين و الف الف هنا على كل شي جربتيه , ان شاء الله وجك ابيض دوما
    و اكيد فيك تستعملي بسكويت مطحون مع زبدة و العيار تقريبا لكل 4 علب بسكويت بيلزمنا باكيت زبدة بقى انت فيكي تحددي سماكية طبقة البسكويت على زوءك و تستعمل المقدار كله او تلات ارباعه حسب ما بتحبي ;)

  13. منى 23 February 2011

    هلا جمان :)
    فيك تستعملي الفيلادافيا بتطلع بتجنن , الموزاريلا ما الها علاقة ابدا هون ;)

    ايا سؤال تاني من عيوني

  14. منى 23 February 2011

    هلا rmroom:)
    يا ترى شو قصد بالنشا الحب ؟ ما عرفته
    بس فيك تستعملي النشا العادي المتوفر عندك و فيك كمان تستعملي الطحين عوض مقدار النشا اذا مو متوفر عندك ;)

  15. ورد 23 February 2011

    والله احلى وصفات انا كتير حابه اتعرف عليكي يا ست منى وكتير معجبه بشخصيتك واكلاتك والتشييز كيك حابه كتير جربو وانشالله ينجح معي لاني مبتدئة بتحضير الاكل كتير وفوق ماتتصوري وشكرا كتير على هالوصفات بجد اكتر من رائعة

  16. منى 23 February 2011

    هلا ورد :)
    من زوءك حبيبتي ربي يديم المعروف و الود
    لا يهمك كلنا كنا في يوم مبتدئين و شوي شوي الواحد بيتعلم :zzz

    معناها انابانتظار تجربتك و ايا سؤال انا هون ان شاء الله

  17. ربى 24 February 2011

    حابة سلم على كل الصابايا بالموقع كوني عضوة جديدة معكم بس السلام الاكبر إلك منى
    يعطيكي الف عافية على هالوصفات الرائعة
    انا بحب كتير الطبخ و تحضيرالاكل بس ولوكني صيدلانية ومعجوقة بالشغل برا البيت بعدت الفترة الماضية كتير عن المطبخ ومن فتررة قررت دور على حلو بالشوكولا ع النت وهيك اتعرفت على هالموقع الظريف وهي الي كام يوم غايصة بوصافتو ورجعت بحماس مو طبيعي بدي اخلق وقت للمطبخ اليوم رح اعمل كرات لحمة مفاجأة وانشالله تظبط متل مو متوقعة
    بس بدك تتحمليني يا منى لانو ممكن ابعتلك اسئلة كتيرر
    اول شي شو هو ورق الزبدة بالظبط وين بنلاقيه وشو فوائدو ووممكن نعمل هالتشيز بدونو؟
    سؤالي التاني ممكن نستعمل الشوكولا السائلة تبع الساندويش؟
    و شو هو الكريم السائل ؟
    وشكرا منى سلفا ع الرد

  18. لارا مينا 25 February 2011

    صباح الخير .. وجمعة مباركة

    أنا عملتها اليوم وفي انتظار النتيجة لأن مثل ماخبرتك قبل , عدلت شوي بالوصغة إذا زبطت ok وإذا لأ بتكون تجربة من ضمن التجارب .
    ………… وسؤالي :

    في الحشوة ثلث كوب نشا , بس في طريقة التحضير مش موجود مع باقي المكونات في الخلاط , وكمان في الوصفة الأصلية التشيز كيك الرخامية مش موجود النشا في الحشوة . هل هو موجود أو لأ ؟ مع إني ماحطيته في الحشوة , بس حبيت أتأكد .

    ألف شكر :zzz

  19. منى 25 February 2011

    هلا لاروش :)
    يييي لاروشة , النشا ضروري و خصوصا اذا استعملتي الحليب , لان بالوصفة القديمة ما كان في هل الكوب الزيادة , صح حقك علي انا نسيانة هل الاضافة في الطريقة :roll
    بقى الله يستر رح استنى شو صار معك

    تاني شي استمتع جدا بالجمل الي كتبتيها عن اديسون , بالفعل الواحد لازم يخليها حلقة بودانه , دوما الياس مو من الحيياة :zzz

  20. منى 26 February 2011

    هلا فيكي ربى :)
    منورة الموقع و مشرفتيه و يا هلا فيك اخت غالية و كريمة
    مبسوطة كتير ان الموقع قدر يرجعلك حماس للطبخ , و بالفعل لما بتكوني عم تشتغلي بيصير صعب كتير تلاقي وقت لتعملي تجديد بالمطبخ , لهيك انا ممنونة ردك كتير و كمان ممنوة انك عم تجربي اشيا جديدة
    يا ترى كيف طلع الكباب مفاجات ؟

    ورق الزبدة منلاقيه بمحلات بيع معدات الكيك و ممكن بمحلات المختصة بالخياطة و فائدته انه بيمنع الكيك من الالتصاق بالقالب و اذا ما حطيتيه بيمشي الحال بس رح تتغلبي وقت تطالعي القطع من القالب

    ما جربت الشوكولا السائلة بس اتوقع بتصير , و الكريم السائل هو شي متل الحليب بلونه بس اكثف منه و متوفر بنوعين شي للحلو و شي للطبخ و لما منخفقه رح ينتفخ و يصير متل الكريم شانتيه و هو متوفر بكل المولات بعلب كرتون ;)

    ايا سؤال تاني من عيوني و انا بانتظار تجربتك ربى , هلا فيك

  21. zina 27 February 2011

    السلام عليكم مدام منى الله يعطيكي العافية شو هك وصفات الي بتجنن عن جد الواحد ما بيقدر ابدا يقاوم انو يجرب. بس اذا بتريدي عندي سؤالين:1شو مقاس البيركس.
    2 شو اسم نوع الشوكولا الي بتستعمليه.
    شكرًا كتيرررررررررروو

  22. منى 27 February 2011

    هلا زينة :)
    ان شاء الله تجربيها و تكون طيبة و متل ما بتحبي

    البايركس هو القياس المتوسط و الشوكولا استعمل شوكولا لي , شفتها اطيب شي و متوفرة على الاغلب بكل المولات ;)

  23. ربى 28 February 2011

    ميرسي يا منى على هالترحيب اللطيف بيسعدني كتير انضمامي لموقع فيه هيك شيف مميزة ومثابرة سورية
    كرات اللحمة المفاجأ طلعت طيبة كتير
    ومبارح كمان عملت مطبق الكوسا وكمان طيب يسلمو هالايدين
    بالمناسبة منى شفت فلم
    Julia&Julie
    هالفلم عن شيفتين وحدة مشهورة وكبيرة امريكية عاشت بفرنسا مثلت دورهاميريل ستريب والتانية امريكية صغيرة معجبة فيهاكتيرر بدأت مشورها ع النت
    كتيرررر بيشبهك هالفلم لازم تشوفيه في حال ما كنت شايفتيه من قبل

  24. منى 1 March 2011

    هلا ربى :)

    صحتين و الف عافية حبيبتي , مبسوطة كتير ان الوصفات عجبتك

    يا ستي الفلم من لما طلع وصلتني اكتر من رسالة من الاخوات هون لحتى شوفه و شفته , مو معقول شو استمتع فيه و شو في لحظات مشتركة بيني و بين بطلة الفلم , مثلا لما اتصلوا فيها ليعملوا معها مقابلة , بذكر لما وصلني اول اتصال من الجمعية السورية لذواقي الطعام كانت ردةففعلي حرفيا متلها :grin

  25. zina 2 March 2011

    مرحبا مدام منى أنا مبارح جربتو بالليل بس ما بعرف ليش ما طلع 3 طبقات طلع طبقة البسكوت وطبقة بيضة فيها بقع شوكولا .شكرًا كتير

  26. منى 2 March 2011

    :roll يا ترى خلطي الشوكولا مع كوب من المزيج و الا ااقل؟

  27. zina 2 March 2011

    خلطتو مع كاسة كاملة متل ما قلتي بلوصفة

  28. zina 3 March 2011

    اذا بتريدي قوليلي شو اعمل حتى يطلع شكلو مثل الصورة لان الطعمة كتيرررررررررر طيبة والكبار حبوه قبل الصغار :?

  29. رغد غسان علاء الدين 6 March 2011

    ليش نصنع البسكويت؟ ليش ما منستعمل بسكويت سامي المعروف باسم بسكويت الشاي؟؟؟؟؟؟؟ :sigh

  30. zena al afandi 15 March 2011

    مرحبامدام منى، تسلم إيدكي على هالوصفات الرائعة….أنا الحمد لله شاطرة كتير بالطبخ بس للأسف لسه كتييييير جديدة عالحلو. هلأ أنا جربتها بس ما طلعت معي متل الصورة :cry. اول شي حسيت الشوكولا قليل شوي مع إنو إستعملت المقادير بالظبط؟؟. وتاني شي طلع البسكويت شوي اله طعمت طحين ومو كتير متماسك ياترى شو السبب؟؟. كمان ممكن استبدلها بخلطة البسكويت تبع التشيز كيك العادي؟ممكن أحطها بالفرن؟؟ لا تواخذيني الله يخليكي والله يجزيكي كل خير يارب 

  31. violet 16 March 2011

    السلام عليكم
    هلأ بس بدي أتأكد مو النشا قصدك فيه الكورن فلور ؟؟
    وكاتبه الفانيليا مرتين يعني قصدك ظرفين فانيليا ؟؟؟
    هلأ أنا فرني مافيه درجات حرارة :sigh بس في درجة عالي وواطي وشخطين بيناتن فما بعرف كيف بدي عيره ؟؟؟؟!!!!!
    ويعطيكي العافية

  32. منى 17 March 2011

    هلا فيلوليت :)
    النشا هو الكورن فلور و الفانيليا ما بستعمل الظروف نهائيا , لاغيتعن من حياتي من شي الف سنة و ما بستعملهن الا لما انقطع , بجيب فانيليا فرط من المدينة , كتير اطيب و اوفر

    العيار هو المنتصف تماما ;)

  33. سانتاريتا 18 March 2011

    الله يعطيكي العافية يامنى على هالوصفة وان شالله بجربها لانو ابو الشباب عندي شاف الصورة وانا عم اتصفح الوصفة وهلكني بدي منها شكلها طيبة يلا قومي ساويلي ياها :eek
    يسلمو حبيبتي :)

  34. فرفوشة 28 April 2011

    جربت هالوصفة من كم يوم
    وطلعت روووووووووووووعة :zzz
    يسلمو إيديك منمونة
    إلهي يسعدك ويسعد كل احبابك

    وهي صورة تطبيقي للوصفة بس أنا قللت من طبقة الشوكلاته.. شكرا إلك مرة تانية
    http://www13.0zz0.com/2011/04/28/12/852095255.jpg

  35. ورد 23 May 2011

    وانا جربتو من يومين طبعا طلع بيجنن وهلا بحب اقلك انو رح صير طبق وصفاتك على العمياني من جد صار طبقت كذا وصفه من عندك وكل شي عبيطلع شي ببيض الوجه الله يوفقك يارب ويحققلك مراد قلبك بس انا عندي سؤال انو طعم الجبنه ماكان واضح كتير هلا هو هيك اصولو ولا لأ مابعرف او انا شكيت انو تكون الشوكولا هي اللي طعمتا اقوى مابعرف المهم طلع شي طيييييييييييب كتير ويسلمو ايديكي كتير

  36. ورد 23 May 2011

    اه ونسيت اقلك انو انا عملت اضافه بسيطه حطيت برش الشوكولا فوق الجاتو قبل التقديم عطا منظر كتير حلو حبيت قلك هالاضافه :grin

  37. omislam 29 May 2011

    اليوم عملت هالوصفة وطلعت كتير كتير طيبة واكتر شي عجبني هو طبقة البسكوت طلعت مقرمشة وهشة بنفس الوقت شي ناهي تمام بس الشكل طلع اقرب للمكعبات الرخامية مابعرف ليش ماطلع طبقات على كل حال طيب جدا جدا
    وانا اكلته هو وسخن يعني لسه مادقته هو وبارد
    يسلم دياتك على كل الوصفات

  38. ام يزن و زينه 6 August 2012

    مرحبا اخت منى
    انا جديده هون وكتييير معجبه بالموقع والوصفات واهم شي بتفاعلك مع المشتركين والاسئله الي بيطرحوها يعطيكي الف عافيه ..
    انا جربت هالوصفه امبارح وطلعت كتير طيبه بس طبقة الشوكولا ما طلعت عالوجه لفوق متل ما حكيتي ضلت متموجه بالخليط الابيض ..
    بس حابه اعرف اذا في غلط عملته مثلا ما خلا خليط الشوكولا ينفصل مشان لما اعمل الوصفه مره تانيه اضبطها اكتر ..
    بتزكر زمان كنت اعمل تشيز كيك ساده بس كنت اخبزه بحمام مائي .. معقول تطلع النتيجه افضل بهالوصفه اذا انخبز بحمام مائي ؟؟

  39. منال 21 February 2013

    السلام عليكم عزيزتي منى عم تطلع عندي طريقة الصنع مرتين هاد شي طبيعي والصورة ماعم تطلع عندي كمان هاد بسبب تحديث الموقع بس حبيت اتطمن

    • Mona 22 February 2013

      لا مو طبيعي , لسى ما اكتمل التصميم , بده كم يوم و كلو بيزبط متل ما بتحبي ان شاء الله :)

  40. زينا 11 December 2013

    مرحبا سيدة منى, شكل الوصفة: مكعبات طبقات التشيز كيك رائعة, بدي جربا انشاء الله بس بدي أسألك سؤال وقت بتصبي المزيج فوق العجينة الباردة ما بتتركي بالبراد مشان يجمد قبل ما تحطي فوقه الشوكولا, لأنو إذا حطيتي فورا الشوكولا بدون ينخلطوا مع بعض ؟

    وكمان سؤال أنا بستعمل فانيليا الظروف بيصير ؟ وقديش بحط ظرف كامل ؟

    • منى 22 December 2013

      هلا زينا
      لا ما بخليه بالبراد , ما في داعي , انت اتبعي الوصفة بالحرف و بتزبط ان شا الله
      اكيد بيصير الفانيليا البودرة , حطي الظرف كله

      ايا سؤال من عيوني التنتين

  41. سالي 23 December 2014

    :(
    ما ظبطت الوصفة معي ؛( ليش يا ترى؟ضلت شي ساعة ونص بالفرن عم استناهاتتماسك شوي كل الوقت مريقة وبعدين شعلت عليها من فوق لنشف وشها شوي بس من النص رطبة وقت غزيتهابالسكين، وبعد ما بردت بالبراد جمدت منيح بس مبين انها نية
    أنا حطيت الفرن على أوطى شي لأن ماعندي عيارات وأنا بعرف انه أوطى شي هو ال150 أو 160 صح؟
    أنا كمان عندي مشكلة فشل الكيك داااائما بيطلع قلبه ني شوي، شو الحل برأيك؟
    هلأ عم فكر اعجن الصينية بشوية كريمة وشوكولا واعملها راس العبد مشان اخفي الفشل ههه

    • منى 19 January 2015

      هلا سالي :)
      ني معناها فرنك كان واطي زيادة عن اللزوم ، يا ترى شو نوعية فرنك لحتى ااقدر فيدك مشان الكيك

      هههههه برافو عليك ، ما في فشل في تجارب ع طريق النجاح

  42. سالي 26 December 2014

    بدي عيد المحاولة بس بدي استفسر شوي من بعد اذنك، هي لازم تنشف ولا بتضل رطبة؟ وطبقة البسكويت من تحت بتكون مفتفتة شوي؟
    وبتنفش وبترتفع بالفرن متل الكاتو ولا مالا زم هيك تعمل؟ انا ارتفعت معي وبعدين هبطت
    وبينفع استعمل جبن المثلثات بدل كري؟
    آسفة عالاطالة بس أنا جديدة على هالنوع من الحلويات وبدي ينجح معي وشكرا كتير الك ولموقعك الرائع :)

    • منى 19 January 2015

      هلا سالي :)
      هي بيكون قوامها متل الكاسترد العادي ما بتفرق عنه شي
      البسكوت مو مفتفت ، متماسك و بيقرش
      و ما لازم ينفش الا شي بسيط كتير لا يذكر تقريباً و ممكن تستعملي المثلثات هون

      و لا يهمك بتنوري و ايا سؤال تاني من عيوني التنتي

  43. سالي 23 January 2015

    شكرا كتير على ردك كلك زوق
    :*

تقييم الوصفة
عاديةقد أحضرهاجيدةممتازةأكثر من رائعة (2 votes, average: 3.00 out of 5)